Akken kan i sliɣ yeckem ɣer sbiṭar tergagi tasa-w, tefrawes, mmektaɣ-d imi i d-nemlal di Tizi Wezzu, ur fursaɣ temlilit yid-s, ur mmeslayeɣ yid-s akken ilaq ɣef ussan-nni n ẓẓmik, ɣef wasmi xaḍen yimawen, ɣef wasmi yerẓa asalu m’akken qessiḥet tizi. Yerẓa asalu s isura degi yerfed teqbaylit am lxiḍ n rruḥ yessidiren iẓedwan yesmadayen leɛnaya i uqbayli imiren. Yuli-d ad yawi tazemmurt n uraɣ, d tunṭict n tfaska n isura s tmaziɣt i win i d-isellken Tawrirt si tatut ireggin allaɣen. Yettwali kan am win i wumi yeččur wul, yebɣa ad d-yini tiqerḥanin, tid-nni i t-yeǧǧan ar ass-a n wussan ur yesɛi takasiṭ taneṣlit n usarau yexdem s ufus-is “Tawrirt yettwattun», ar ass-a mazal-itt akin i lebḥer, ceggḍen-t, ḥerqen-t, asaru ixdem-it, aɣellet ɣellten-t wiyaḍ!! I Azzi, i Meqran, i Davda d Mennac? Anwa ur rḥint tewririn yettwattun s tmuɣli n Mɛemmeri d Abderrehmane Bugermuḥ? Anwa ur nḥemmel xas ur t-id-yenna ara? Anwa ur tečči tizi n wedfel? Tira-s, ass-a, am isura-s i d-yettarran deg-naɣ tudert yal imi ara aɣ-teffeɣ , di Lezzayer n wass-a. D cwiṭ n lehna, d asirem i yelmeẓyen, d ceɛlalu i s’ara sen-yemmel abrid i wulmen i ssinima s tmaziɣt. Ad sduklen iɣallen-nnsen, ad as-ilin d iyeffusen, ad itwilen, ad ddun d wi ten-yifen, ad ttɛanaden ar t-awwḍen.
Zira