Tuɣal-as tejmilt meqqren i tmarut d tneggalt taqbaylit Dihya Lwiz, sɣur tiddukkla tadelsant “Agraw”, ass-nni n lǧemɛa 5 deg waggur n yennayer 2018, deg temkerḍit n tɣiwant n Chemini deg lwilaya n Bgayet. Ɣef 10h00 n ssbeḥ i tebda tejmilt-agi s kra n temsikniyin ɣef wayen tura d wayen i d-teǧǧa tlemẓit-agi i tewwi lmut ilindi. Tella-d diɣ temsikent n wayen yettwarun fell-as deg tɣamsa n tmurt. Ma ɣef 13h30 d afella, yella-d usenɛet n yiwen usaru i d-yewwin awal fell-as, syin ɣer-s, llant-d tnagiyin n wid i tt-yessnen ama deg tira ama deg tudert n yal ass. Ma ɣef lewhi n 14h15, tella-d tɣuri n yisefra akked kra n yiḍrisen. Am wakken daɣen i d-yella Mass Larbi Yahioun (d aselmad d amaru) d ttiɛad s yiwen n usarag igerrzen, ideg i d-yewwi awal ɣef umezruy n wungal n teqbaylit, d wayen i icudden s umata ɣur-s, syin d askasi s yisteqsiyen d tririt fell-asen, ma ɣer taggara maḍi yella-d ufraq n yigerdasen n uttekki i wid yekkin deg tejmilt-agi. Ad nesmekti kan belli, mačči d tagi i d tajmilt tamezwarut ara as-yuɣalen i tmarut-agi mm snat n tutlayin taqbaylit akked taɛrabt, seg wasmi temmut deg useggas iɛeddan, yal tikkelt d anwa ara as-yerren tajmilt, nessaram ur tettili ara d taneggarut.
Ghani Amazigh