D iseggasen-aya ur d-yettunebdar yisem-is akken ilaq lḥal di tlemmast n Lezzayer. Yal tikelt imi ara d-yeḥder umuli n tmenɣiwt-ines, wa ijebbed wa ikerref, nbedzzeg nettkaw am uceṭṭiḍ ntettu ansi i d-nɛedda. D tidet, ahat tura asmekti d amxalef am acemma imi yella ttawil n facebook i d-yefkan udem lɛali i umennuɣ n uqbayli ass-a n wussan, meḥsub kra yellan d aqbayli yettawi ccnawi n Lwennas, timenna-s, tteṣwira-s d aɛwin n ugrawliw, ad yeknef akken ad yemmekti anda yedda laṣel-ines. Di taddart-is, di tmurt-is, di Tizi, akin i tlisa n Lezzayer, yal wa d tamuɣli-s: wa yeqqar “lukan mazal Lwennas tili ur nḥedder i nnger», wayeḍ “limer mazal-it ur nettnuz ara s rrxa, ad nezdi lqedd-nneɣ gar wiyaḍ», “Wa yeqqar yettuɣad iruḥ d asfel, ayen akken i ɣef yecweḍ nebra-yas am ṭṭbel deg waman”… Lwennas deg ul, ussan di tmurt mxallafen, da fsan, da d iwraɣen. Yenna umeɣnas: “Amarezg imeɣrasen ur neḥdir i tigi” maɛna tikwal axir yiwen ad asent-iḥder, akken wa ad yemmeslay i yiman-is xaṭer abrid mazal iḍuuuuuuuuuuul!” akka a Lwennas!. Ayen i ɣ-yeččuren tiṭ d asmekti n Lwennas di tlemmast n Lezzayer, timliliyin ctaqen medden ad asent-ḥedren seg imi yettwaɣdem di tala n bunan. Nesɛa lḥeqq ma nzux yis-sen: i Ccnawi seg ul n Salaḥ Gawa, i Tyita d asirwiwec, tesɛa sser n Xirddin Kati, i Taɣect n Samir El Ḥakim yesɛan lhiba am imeslayen Lwennas, i Imeslayen lqayen n Emanuel Ravot, xas ur tessin taqbaylit tefhem d acu i d taqbaylit ar Lwennas… di rebɛa deg uxxam n uɣmis “Algérie news», kulci yesɛa sser: cwiṭ n ṭṭlam, inaẓuren, ineɣmasen, imeɣnasen, iḥbiben, inebgawen qqimen ɣef terkabin yersen ta ɣef ta am umezgun n rruman. Cwiṭ n tafat tewwet deg udmawen n Salaḥ, Xirddin d Samir. Da d asefru n Lwennas d wayen ɣef yezza yecweḍ, da dayen tura Ema, ayen akken yessifriwisen imdanen akin i leqyud n tutlayin. Sya ɣer da d azuzen s tgiṭart neɣ s umundul, sya ɣer da d tizlatin-is yuɣalen d acewwiq cennun-tent medden yal imi llzen, yal imi ara nadin cwiṭ degi ara ṭṭfen imi ara ten-yewwet wugur. Cwiṭ sɣur Salaḥ, cwiṭ sɣur ineḥdar, am terbaɛt n ccna i d-ilulen din din, s Lwennas deg ul… Taglimt teccarew imi d-cennun “A Llah wakbar” di tlemmast n Lezzayer, am zun yeḥder Lwennas, yella gar-aneɣ, la d-yettmuqul axalaf yellan amer yiwen wass ad yegmu, xas xellun-tt ɛecra, yiwen ad tt-id-yeḥyu!.
Zira