Medlent tewwura n Tfaska tis 10 n Ccna Amaziɣ I d- yellan deg temdint n Bgayet seg 04 almi d 09 yulyu 2012, s yiwet n tmeɣra meqqren ideg yella Ccix Sidi Bemol akked yicennayen d tcennayin I d- yufraren ilmend n temzizelt I d-yellan, am leɛwayed.
Tafaska n useggas-a, tuɣal-as d tajmilt i yiwet n tgejdit n ccna n teqbaylit, wa d Chrif Kheddam. Aṭas n leqdic I d -yellan ɣer tama n tqaɛett n Nnasiriya, imi tamdint n Bgayet tedda d tikli n tfaska-ya; taqaɛett-nniḍen deg « La Brise de Mer »
daɣen llant-d tmeɣriwin yal iḍ ɣef teɣzi n 6 wuḍan, rnu ɣur-s isaragen ɣef uẓawan d tmedyazt n teqbaylit, deg Uxxam Umezgun Malek Bouguermouh.
Aya, mebla ccek, dayen ara d-yeldin abrid i yinaẓuren imaynuten, dayen daɣ ara d-yessakin imdanen ɣef wazal n tezlit taqbaylit d umkan-is deg tmetti ideg tettidir. Sumata, dayen yesnernan di ccan n tfaska-ya, imi wid I tt-id- iheyyan, fkan tagnit i yimezdaɣ n Bgayet akked wiyiḍ I d- yusan sya d sya akken ad farsen deg wussan-a n umerreḥ s ccna n teqbaylit d yinaẓuren ur ssawḍen ara ad ten-walin uqbel. Aya, dayen i aɣ d-nnan kra n yimferǧen, seg wid nesteqsa, ilmend n yiḍ aneggaru n Tfaska n Ccna n Tmaziɣt, tin yekfa Ccix Sidi Bemol iḍ- nni n letnayen 09 yulyu, deg tqaɛett n unnar n Nnasiriya, imi fursen tagnit s wazal-is wid I d-yusan berra i lwilaya, akken kan ad walin « Ccix-nsen » Sidi Bemol ad sen-d yesmeḥses « yizlan nni ibeḥriyen » !
Mi yekfa ccix Sidi Bemol, dayen, Zira akked Muḥend Crif Rambi refden awal akken daɣ aɣ-d-fken ttiɛad i useggas I d- iteddun.
Samir At Buɛza