Tameddit n wass n ssebt 14 di yulyu, s lmendad n tdukla tadelsant « Itri Adelsan », yurar-d unaẓur Akli Tmazirt i tikkelt tamezwarut deg uxxam n yilmeẓyen Abderrahmane Fares n Uqbu amunulug-is amaynut umi isemma : « Ax yella, tuṭṭfa ulac ». Amunulug-a ideg yesdukkel umeskar-is nnecṛaḥa akked uskan n wuguren n tmetti, yewwi-d deg-s ɣef yiɛewwiqen i ttemlilin yilmeẓyen di tedbelt am : tbiruqṛatit, tukci n tjuɛal akked lekdubat i yes-sen xeddɛen ilmeẓyen yimḍebbṛen n tmurt. Deg umunulug-a Akli Tmazirt, yerra tajmilt i uɣyul aɣersiw iɛawnen s waṭas timetti taqbaylit ladɣa deg wayen yerzan asiweḍ n sselɛa ; dɣa fella-s i yebna agnu n umunulug-is, imi yessewjed-d asenfar n uslali n yiwet n tkebbanit ara yettkelfen s tterbiya n teɣyal di tmurt n Leqbayel. Acu kan, yemlal uguren mi iṛuḥ ɣer l’Ansej ad as-d-tefk tadrimt, imi asenfaṛ-agi n ttrebya n yiɣyal walan-t ur igerrez ara. Azal n ssaɛa i yestemteɛ uzayez(public) yeččuṛen tazeqqa n uxxam n yilmeẓyen Abderrahmane Fares s umunulug-a ideg tella taḍṣa akked tmussni ladɣa imi Akli yefka-d akk isallen yerzan « aɣyul » d wamek i tteɛkasen iberdan kra n yimḍebbṛen n tedbelt i yilmeẓyen yesɛan tiktiwin yelhan neɣ i yebɣan ad xedmen kra n lewqam. Mi yekfa umunulug, ngubeṛ Akli Tmazirt mi yella yuder-d seg usayes(scène) nesteqsa-t, ata-n wayen i aɣ-d-yenna : « Yeɛǧeb-iyi lḥal imi iyi-d-yesmeḥses akken ilaq uzayez, ad iniɣ dakken nesɛa s tidet azayez n umezgun da deg Uqbu, d ayen i yessefṛaḥen aṭas dɣa ». Akken ad d-nesmekti, aḍris n umnulug « Ax yella, tuṭṭfa ulac » i d-yurar Wakli Tmazirt, yemmug s lemɛawna gar-as akked umyaru Dda Boualem Messouci bab n tsuqilt n « temɛayin(les fables) n La Fontaine s teqbaylit ».
M. C.