Taggaran n tallit i ujerred n yismawen d ufran n wulmuden i akk inelmaden yerzan ar tesdawit n Bgayet, deg tzeqqa n Ubudaw, anda d-mlalen wazal n 7000 n yinelmaden imaynuten, tella-d ass-nni n letnayen 15 yulyu 2012. Tiririt ɣef wayen fernen yinelmaden yebda iḍelli n lḥed, ad i kemmel ar azekka 24 yulyu, din dɣa, ad d-tefru s wudem unṣib ɣef umecwar ara ḍefren yisdawanen-a n 2012/2013.
Ɣas akken yella ttawil n internet, tuget deg yinelmaden-a d wid iran, axir, ad ruḥen ar umkan, akken ad gzun ugar, imi d-tella tesqamut n uwelleh din-ya, deg tesdawit n Bgayet.Rnu ar tesqamut-a tiyiḍ yellan deg tɣiwanin d tesnawiyin yemxallafen.Aya akk, iwakken ad tɛeddi tallit-a n ujerred akken ilaq, ad fernen acu n wulmuden i sen-iwulmen.
Ihi, ugar n 7000 gar tnelmadin d yinelmaden imaynuten, ad asen-d-tefru deg ussan-a n 22 ar 24 yulyu, yellan d tallit, daɣen, n ucetki i wid ur yettuqenɛen ara s wayen i as-d-fkan d ulmuden.
Aɣbel ameqqran, ad yeqqim d win n yimukan i yiḍes, imi, rnu ar umḍan-a meqqren 7000 ara d-ikecmen, ilaq ad neḥsu dakken daɣ, imḍebren n tesdawit n Bgayet fkan awal aseggas yezrin akken ad d-rren ar Bgayet inelmaden yettuceyɛen berra i lwilaya, send iɣublan-nni d-yellan deg Sṭif akked Jijel, azal n 2800 n yinelmaden i teɛna taluft. Imḍebren-a, fran-asen-tt belli ad asen-d -qeblen tuɣalin-a acu kan ur asen-ḍminen ara imekwan i yiḍes.
Ad d-nesmekti kan, aseggas-a yella-d umaynut daɣen deg wulmuden neɣ ahilen n Tesdawit n Bgayet, imi d-yerna “Usegmi n lǧessa d waddal?” (Education Physique et Sportive- EPS). Tabɣest yelhan i yinelmaden-a imaynuten!
Samir At Buɛza