Theyya-d tidukkla « Cine+ »n Temdint n Tmeẓrit, deg lwilaya n Bgayet, yiwet n tafaska n usaru, s wazal-is, deg tezrigt-ines tamezwarut, ussan n 18 almi d 20 yulyu 2012. Ar tama n tidukkla « Ciné+ » teqdec daɣ Tidukkla « cinéma Le France » n temdint n Saint-Etienne. Taneggarut-a, tusa-d ɣef ddema akken ad cerkent tmusniwin, ad ddukklen iɣallen akken ad suffɣen, ugar, awal ɣef usaru, gar yilmeẓyen akken daɣ ad welhen imdanen n Lezzayer s umata akken ad kecmen ɣer uḥric-a n yidles, ladɣa asaru.
Krad(03) n wussan, neflen, d aferreǧ (anezzeh) akk d umeslay anagar ɣef usaru deg Tmezrit, tamdint-a n yiwen gar tgejda n usaru Azzayri d uqbayli, Azeddine Meddour! Aṭas n yisura i d- yellan deg wahil, imḍebren ferqen-ten d iḥricen; aḥric n warrac, win n yilmeẓyen akked uḥric n twaculin. Sin akkin, mi yekfa uferreǧ, yegra-d umkan i umeslay d usqerdec ilmend n usaru-nni akk d usaru sumata.
Tgerrez tfaska-ya, ugar, imi deg tikkelt-is tamezwarut, aṭas n yimdanen i d- yusan ad walin daɣ ad lemden ugar ilmend n tegnit-a i d- tefka tidukkla “Ciné+” akk “Cinema Le France », aya, d ayen i aɣ-d-yenna mass Azedine Kedadouche, yiwen gar yimḍebren deg tiddukla « Ciné+». Yerna-d : « iswi-nneɣ dakken ar sdat, ad timɣur tfaska-ya, w ad tuɣal s wazal-is, akken daɣ ad teqdec d yilmeẓyen n Lezzayer akk, xersum, sin akkin ahat ad tuɣal d tagraɣlant ».
Ad d-nesmekti belli Tiddukla “Ciné+” d tin yellan deg unnar, aṭas n yiseggasen aya tura, tesselmad imeẓyanen d yimeqranen tira d usufeɣ n usaru, akken daɣ i teskanay isura i yimferǧen, tettruḥu s ufus n yiɛeggalen-is ɣer tudrin d tɣiwanin akken ad mlilen w ad walin isura akked yimdanen.
Samir At Buɛza