Ddaw leḥkem n Mouloud Hamrouche tezmumeg-d kra tilleli. Tefka-d udem. Nulfan-d yiɣmisen s tuget , tilbizyu teldi tiwwura ines i tidukliwin tisertiyin ( ikabaren) s lmendad n unemhal-ines n yimir aneɣmas Mohamed Abdou. I tikelt tamezwarut d lulluf n yemdanen i yeẓran (deg tilibzyu n tmurt ) irgazen n tisertit am Benbela d Hocine Ait Ahmed id yuɣalen ɣer tamurt. Meɛna yal tadyant tgelud s yiɣilifen-is, leqbayel ccfan d akken anekcum n Si Lhocine yella-d assen deg akabar n RCD yegga agraw -ines di taɣremt taɣelnawt( palais des nation) assen 05/16 decembre 1989. Iɣisan ara yesnedqen agni n tisertit di tmurt n Leqbayel bden imiren. Icerig ger imeɣnasen n tugdut bḍan d lesfuf wid n yedan di llem n Said sadi wid yeddan di llem n Ait Ahmed. Anaqeb bayger-asen yewweḍ ula ɣer tiwaculin. Si tama Nniḍen( n tmurt n Lẓayer) lwelha n yeɣmisen tezzi ɣer ukabar n FIS, yettimɣuren yeqqar mazal armi yuɣal amzun d awaɣzen ara yesbelɛen tamurt wakali. Abeḥri n tugdi yebda yettṣuḍu ɣef idisan n tigduda. Di lawan –nni yal akabar yesɛa aɣmis –ines amedya El Munqid n FIS, l’avenir n RCD. Deg akken tuget lemɛenda ger ugraw ɣef yidles d tugdud d tirni n yiɣalen inemlayen, di ssin sufɣen aɣmis s tmaziɣt ( asalu n RCD amaynut n FFS) zun akken snarnan deg unamek n wanzi yeqqaren « lemɛenda n tnuḍin ɣer ticebaḍin ». Yedda lḥal alarmi mi d yenna wa awal wayeḍ as id yezg d i lmendad. Mi yekcem wa di tifranin wayeḍ asen- yezzi aɛrur, mi d yasawel wa ɣer timesbanit ddurt nniḍen wayed at iɛaned. Weḥlan, iḍuḍen acu ara cciden neɣ ara xiḍen , tagmet gar-asen tezgad tenxuxed. Berra n tmurt n Leqbayel lecɣel ddan akken nniḍen. Win ara id iḥakren si lebɛid ad-as yinni tugdut tefka iẓuran di tmurt imi awal tezzi-as id nnuba, timesbaniyin deg iberden gtent( amedya tamesbanit yegga umusu adelsan amaziɣ assen n 5 janvier 1990 deg lḥan azal 500 000 n yemdanen) ! Lemɛna targit ur teḍul ara. S ssebba n uɛaned n ukabar n FIS ( yettwaksen tura) yeɣli leḥkem n Hamrouche, yussa-d win n Sid Ahmed Ghozali. Ddew leɛnaya-s llant-d tifranin ɣef ugraw aɣelnaw (di decembre 1991) deg akabar-agi yemčeḥ tarbut , yewwi tuget n ikersiwen . Di Tmurt tewwet znezla ! Amur n yimawlan n tisertit tṣuɣun ilaq ad yebṭel lbut-nni( Said Sadi, Abdelhaq Benhamouda, El Hachemi Cherif ) wiyaḍ sawlen akken ad kamlent tifranin deg uḥric-nsen-t wis ssin . Akken ad yili waya ( akamel n tifranin) kra seg ikabaren-agi sawlen i wagdud akken ad yegzem abrid s wudem n tugdut i ukabar n Abasi Madani( ger assen le FFS, PT, ..)
…yettkemmil
deg usebtar 13