Ddurt-agi yezrin, tidukla usnerni n lḥirfat (ADPAL) n lwilaya n Tizi-Wezzu tessudes-d ussan n tannant γef amek i d-tettili tuksa d uḥareb n tament ugellid (La gelée Royale) s teγzi n 6 n wussan, di tγiwant n Wizgan. Leqdic yebda ass n 27 ctember deg aggur yezrin almi d ass wis ssin deg aggur ideg nella, anda i d-ussan 150 n yemdanen i qedcen deg annar-agi n tzizwa di lwilayat yemgaraden n tmurt n Lzzayer, amedya; Bgayet, Tubiret, Skikda , Taγardayt, Lzzayer Tamanaγt, Tipaza, Bida, Boumerdes d waṭas niḍen. Leqdic-agi yesduri-t-id wexxam n yedles Ferrat Remḍan n tγiwant n Wizgan, anda timsirin ttakent-ent-id ssin yimusnawen n tmurt n Fransa i ttewxeṣen deg weḥric n tfellaḥt, wigi d Mass Rémy Pelissier, aselway n Tfidiralit Tafransist n Lγella n Tament Ugellid, akk d Yann Cusin yiwen umusnaw di ttrebga n tzizwa, anda islemden ssin wussan deg tzeqa n leqdicat n wexxam n yedles n tγiwant n Wizgan, syen fγen γer wennar γer temnaḍt n Wed Σissi deg Tizi-Wezzu s teγzi n 03 wussan, anda i sen-snaεten amek i d-tettili tuksa n tament ugellid (La gelée Royale), d wamek ara d-yilli uḥareb fell-as d wallalen i saxdamen, lfayda i tesεa tament ugellit i tezmert n wemdan d wemḍiq tesεa di tdamsa n tmurt xarṣum di temnaḍt Leqbayel. Dγa tagara n leqdic-agi n wussan n tannent γef lella n tament Ugellid tella-d ass n 02 tuber iεeddan anda ifkan igardasen n tannat i kra n win yukkan deg ussan-agi ukewwen, ayagi yella-d s leḥdur n yemḍebren n tidukla ADPAL n lwilaya n Tizi-Wezzu akk d yemḍebren n tγiwant n Wizgan, anda leqdic iεedda di tegnati igarzen aṭas u yewwi-d lfayda meqqren i wid yettrebin tizizwa.
Isam Bessaci