Uqbel ad rren talast yiqbayliyen i uɣuzu n lakul yekkan azal n 8 wagguren, adabu iger-d tiɣri i yiɛeggalen n Umussu Adelsan Amaziɣ (MCB) d tejmaɣt n yimawlan n yinelmaden iwakken ad d-afen tifrat i temsalt n tmaziɣt. Ɣas akken, yella-d uceqqiq gar snat n teɛrifin n MCB, maca widen i iqeblen ad d-tili temlilit mmeslayen d udabu anda i ssutren anekcum n tamaziɣt s aɣerbaz azzayri. Dɣa, d ayen i ǧǧan taselwit n tigduda teqbel rray-agi s usbeddi n yiwet n tesqamut ara d-yelhin s useḥbiber n yidles amaziɣ s yiḥricen-is i merra: tutlayt, idles d tɣerma. Wagi d asqamu Unnig n Timmuzɣa (HCA) i mazal ar ass-a iteddu deg unnar ulamma ggten fell-ase yiɛewwiqen. Wicqa ! Ass-a, tamaziɣt tudef s uzday n lqedd s aɣerbaz, azal n 240 000 n yinelmaden i tt-yeqqaren ɣer 1427 n yiselmaden. Ṭṭuqten yiɛewwiqen, ur telli ara d tanga am tiyaḍ, ur tessaweḍ ad tili di temnaḍin n tmurt irkelli, maca skud akka mazal amennuɣ fell-as yettkemmil dulaqrar ad tifrir fell-as tagut. D ayen i tt-yessawḍen ɣer yikayaḍen yecban BEM akked BAC ara tt-yesnernin s aswir i ttrajun warraw-is. Yak mazal tarwa n leḥlal ur nberru i ṭṭbel deg waman !
S. M