Tubiret
Atmaten d atmaten, tamuɣli tessemgared-iten !
Am wakken yetturaju, yal ass n 20 si yebrir Tubiret teggar-d irebbi i warraw-is ɣer tikli anda ara ssutren asenṣeb n tutlayt tamaziɣt. Seg tsaɛet tamenzut n tsebḥit, bdan akka la d-ttawḍen wid yuɣen tanumi ttilin di teswiɛin yecban-ti. Di tqaɛet n Ccuhada n temdint n Tubiret, myagaren-d yineɣmasen s kra akka n yibeḥnaq anda uran: “I Lezzayer tamagdayt !” Neɣ ahat “Tamaziɣt tutlayt tunṣibt”. Ulamma mačči d tikli-nni n zman anda iberdan zgan ččuren, tikkelt-a drus maḍi i yewten agerz, tuget deg-sen d widak-nni n yiseggasen imenza n umennuɣ. Deg ubrid, teddun, ttuɣun “Ulac smaḥ ulac», “tamaziɣt d tutlayt tunṣibt”. Ɣer sdat n uxxam n twilayt, mfaraqen di talwit. Si tama-nsen, inelmaden n tesdawit Akli Mohand Oulhadj, fɣen-d s yisem n Umussu yessawalen ɣer timanit ɣer yiwet n tikli tameqrant. Deg ubrid-nsen, ttuɣun almend n wayen i ssuturen, d acu kan uqbel ad msefraqen, yella-d kra n nnec tama n yiwen n Ssayeḥ anda i yella yiwen n usebdad n Lamir Abdelkader. Dinna dɣa i ttaṭṭfen kra n yilmeẓyen.
Bgayet
Ma nnan-ak d acu i d tafat,ini-asen d iɣallen yeddukklen !
Akka ihi, Tamdint n Yemma Gouraya tuɣal d rreḥba i yineɣmasen iwakken ad ddun afus deg ufus i usmekti n tefsut n yimaziɣen yuɣalen d azamul. D imeyyaten n yimdanen i yeddan di tikli-agi yesdukklen snat n tamiwin ur nesɛi ara yiwet n tmuɣli. Ḥala asenṣeb n tmaziɣt i yellan akka yeccerk-iten.
Di tlemmast n ugraw, Lounès Belkacem yettwasnen deg Ugraw Amaḍal Amaziɣ yella ɣer tama n yimesbaniyen. Deg wayen i ssuturen, ad naf “tamaziɣt d tutlayt tunṣibt” si tama, si tayeḍ “ d timanit i tmurt n yiqbayliyen”.
Tizi Wezzu
Temlal tasa d wayen turew !
Tamdint n Tizi tesdukel-d acḥal d aneɣmas iwakken ad d-beggnen lebɣi-nsen s asenṣeb n tmaziɣt di tmendawt. Arezki Abbout, Mouloud Lounaouci d wiyaḍ llan-d d izumal i yilmeẓyen yellan di tmesbanit alamma tufa tmaziɣt amkan-is di tmurt-is. S kra n win yellan deg ubrid, isuɣ iwakken tamendawt n tikkelt-a ad teglu s usenṣeb n tmaziɣt.
S. M.