«… Wid yeṭṭfen adabu, At txidas, imesbaṭliyen ur nemεin, ugaden awal, ma yella d imedyazen, d tasusmi ay ttkukrun. Amedyaz ur yezmir ad yeqqim d awḥid. D tasusmi ay yellan d acengu-yis ineqqen. Yiwen n wergaz war amdur (mebla laεmeṛ) ibeṭṭu tazniqt-is sin n wussan-aya. D yiwen uterras am ugugam, i d-yeǧǧa uneḥṛas (colonisateur) afṛansis da, deg tkurmut (lḥebs) taberkant, ula d timunent ur as-terra tilelli-yis. Dima yettgama ad yeffeɣ seg tkurmut. Taxzant-is teqqel d amaḍal-is. Anemhal, iεessasen, d yimeḥbas nniḍen meṛṛa ssawalen-as Ayyis (cheval). Yella seg wid yesεan axxam n uεeddeb, ḥedd ur d-yecliε deg umezruy-is. Ayyis yella d tagawsa gar ṭṭarma, ṭṭwabel, ikursiyen, isendyaq uhicuṛ, tiferraḥin… d taɣawsa ur nesεi lfayda melba izri (passé) melba imal (futur).
Amedyaz iḥan-d wul-is seg umexluq-ayi yessewhamen. Qqimen wa tama n wa i tafat taqesḥant i d-ikeccmen seg umxuj, ttxemmim ɣef wehdum ur nessawel n tirga-nsen ɣef tilelli, akked tɣelyawt iheggan n yisenfaṛen-nsen. Ttwaɣelben seg twaɣit yeḍran i wegdud-nsen, Ttwazedɣen s yimanen igujilen ur nesεi tifekkiwin (ljettat), ttwaceɣben s yiẓiɣren n wid ur nelli, n wid iruḥen, ufan-d ihi asgunfu-nsen deg ucewwiq, deg umyag, deg tmeɣṛut (la rime).
Ayyis yeqqim-as ihi yiwet n tmeddit, mbaεed assefqed n yiεessasen, iḥekku-d tamacahut-is. Itettru netta yeqquṛ, war imeṭṭawen! Tafekka-s, tasa-s, d utaεliq-is ttwaskawen…»
Ṛacid Ulebsir
Yerra-tt-id ɣer tezwawt Mhenni Xalifi