D tidet, mačči d awal izaden, Tamurt n Yizwawen tnuḥ deg-s tiɣentert n waman (richesse hydrique), anda llan idurar ahat llan waman. Tiliwa d yibaṛajen d inagan ɣef waya. Lamaεna ma nesεa aman ass-a yewwi-d ad nḥezzeb amek ara d-yeqqim azekka, mačči feggeḍ kan. Deg twala-ya (période) yeḥman aṭas ay ttruḥun d aman, imi amdan yettasew s waṭas, yessucuf, yesseway tibeḥyar atg… Maca ahat deg teswiεt-a gedged deg nella ay d-yettmektay Wezwaw aman, am win yettẓumun am win uhu. Imi awal n “Tala” itezzi deg yal taddart, yerga deg ilsawen akken yezga uledda tasebḥit tameddit. Imezdaɣ n tɣiwant n Ayt Smaεel d wid n tid i as-d-yezzin, tuɣal-asen Tala Uregrag d ljennet neɣ ahat d axxam wis-sin, imi, ɣas ma yella deg ayyuren nniḍen n useggas Tala tesgunuf akka cwiṭ, tettɣima i yiman-is, lamaεna deg ayyur-a n Remṭan ad tt-naf d tin idaqen, yeččuren, yettwastaεemṛen sɣur medden deg teɣzi n wass meṛṛa ladɣa seg 16 s (16 h) d asawen, ama d tiḥdayen neɣ d irgazen. Ineggura-ya mačči ala seg imezdaɣ n Ayt-Smaεel yesεan ugar n ukuẓ (4) n tuddar timeqṛanin wanag ula seg tɣiwanin tiyaḍ am Tsexṛiwt, tikwal ula seg Ayt Ɛnan d Yiderginen. Annect-a ɣef tsebbiwt n wawal aẓidan yettwastaεeṛfen, yettazzalen ɣef waman n Tala Uregrag ay yezdigen yiwet n tezdeg tagamant, rnu-yas tasmuḍi ara naf deg-sen ad as-tiniḍ ffɣen-d seg imsemmeḍ (frigo). « Seg aṭas-aya nekk d widak ay ttasuɣ deg Remṭan, yes-sen ay ttruẓuɣ Remṭan, ttasuɣ almi ṛwiɣ, werǧin helken-iyi neɣ nεettabeɣ seg-sen » i aɣ-d-yenna yiwen n umezdaɣ n Ayt-Smaεel. Tala Uregrag mazal-itt akken tella zik, meḥsub ur εad tettwabna akken iwulem. Ahat imḍebbren n tɣiwant ad xemmemen sey-a i zdat ad as-bedden, imi aman d taɣbalut (source) n tudert.
Mhenni Xalifi