Mi ara taweḍ teswiɛt ɣer tegnit n ddiq, yal amdan yettazzal, yettezzi yeffus ẓelmeḍ anda aya yaf tifrat. D tallit ideg ḥwaǧen yimdanen widak-nni i d-yettafen asaka, wid iwumi tamuɣli tejba i tizi. D taswiɛt anda i ḥwaǧen yiqbayliyen d yizzayriyen imerra imawlan n tikta d wid n tebɣest iwakken ad ssizedgen annar. Limer ass-a mazal yella mmi-s n Tasaft, tili, mebla ccekk, ad tifrir tagut ɣef waṭas n temsal.
Mustapha, am wakken yenna fell-as Lwennas : « Ay aḥbib n tegrawla », d yiwen n urgaz n tsertit iteddun s uzday n lqedd, imi ula yettaggad ara tili-s. Deg yiseggasen n lḥers, mi akken imdanen icɣeb-iten uɣrum, netta yesqerdic tamsalt n yidles, n yizerfan n umdan d tlelli sumata. Ur yelli d mmi-s n umerkanti n tedrimt, maca yefruri-d seg twacult tanesbaɣurt n nnif, lḥerma d yiseɣ. Segmi yekcem tasdawit n Ben Aknoun di tmanaɣt, nettat d amennuɣ ɣef Teqbaylit (s unamek wessiɛen). Yeḍfer akka kra n yiberdan n wid iwumi semman « tama tazelmaḍt » anda yelmed aṭas n tɣawsiwin yerzan amennuɣ ɣef yizerfan, tudert d lḥerma n umdan deg tmetti…Asmi i d-yemlal d terbaɛt yecban Ferhat, Sadi d wiyaḍ, yendeh ɣef yidles. S kra n wid i t-yesnen di tesdawit, qqaren-d dakken d netta i d aqerru n tmacint ! ulac tadyant ara d-swejden ineɣmasen i t-yecban ur yettili ara d amezwaru ara iqablen lmeccaḍ, imi yekseb tabɣest, tugdi ur tt-yessin ara. Akka i llan yimezwura n taddart-is : Amirouche, M’barek d wiyaḍ. Yak qqaren : « Aḍar iteddu s aẓar ». Mustapha, yeḍfer abrid i d-nejren yimezwura n Tasaft, netta yerna-as tardast s leqraya. Leqniɛa yekseb ur as-tt-yekkis unekraf, wala asmermed n wid iḥekmen, imi teḍra yid-s am win yeggulen ɣef teblaḍt n uẓekka, amennuɣ ad t-ikemmel ɣas ad d-yeɣli yigenni fell-as. Deg useggas n 1989, yettekki, ahat seg yimezwura i d-yeslalen akabar amenzu uqbel ad d-yili ttriḥ si tselwit n tigduda. Yennuɣ deg ukabar, irebba-d imeɣnasen, deg wass, deg yiḍ netta d timliliyen ama di tesdawit ama deg tdukkliwin iwakken ad yesselmed i yilmeẓyen amek ara ddun deg unnar n tsertit. Ur yelli seg wid yebɣan ad kesben deffir-sen wid yettaɣen awal. Netta yugi awal-nni « Ameqran ad yessendah, ameẓyan ad yeqqar ah », yebɣa ula d imeẓyanen ad ssawalen, ad ttḍebbiren. Aniwa ur d-necfi i Mustapha mi ara d-tili tikli neɣ tamesbanit di tmanaɣt ! Weḥd-s ad yesseddu acḥal d imesbaniyen, acḥan i iwehmen deg-s amek i yessedduy timsal deg wussan yecban widak. Meɛna aṭṭan yuḍen ɣef tmurt mi d-teffeɣ llafɛa n at yičumar yerra- t yemmuɣben, irebba-as lɣiḍ almi ul-nni yekkaten yeḥbes deg uzal qaylil di Tizi Ouzou. Yeɣli-s leḥzen am wabbu ɣef yiqbayliyen imi s kra n win i t-yesnen yeḥsa s wazal-is di tegnatin n ddiq. Tamettant n Lwennas tkemmel ayen i d-yeqqimen ! D ayen i yeǧǧan ass-a, tamurt n leqbayel yellan tettnaɣ ɣef temsal timeqranin, teqqel ɣer tmeclac. Yak yella deg wawal : « Izem yuɣal ileqqeḍ tiweḍfin ! » Tṭes di talwit a Mustapha, tarwa n leḥlal ur tberru ara i ṭṭbel deg waman !
S. M