Tamedit n yiḍeli tesuli tedwilt tis 02 n tfaska n ukarmus id-suddes tdukla tadelsant n taddert n saḥel s lemεawna n tdukliwin-nsen yemgaraden d tesqamut n taddert-agi. Leqdic d win yebdan s wudem unṣib ass n 22 almi d 23 γuct yezrins teγzi n 02 wussan.
Tafaska-agi tella-d s ddaw laεnaya n wesqamu aγarfan aγiwan n Wizgan, asqamu aγarfan n ugarzu n Tizi-Wezzu d mahla n yedles n lwilaya n Tizi-Wezzu, ayagi yella-d s leḥdur n yemḍebren n temnaḍt n Wizgan, ger-aseniselwayen n tγiwanin, Wizgan d Yillulen Umalu, imḍebren n lwilaya nTizi-Wezzu, γef uqaru-s mass Ḥussin Harun aselway n wesqamu aγarfan n ugarzu n Tizi-Wezzu, akk d yemḍebren n yeḥricen yemgaraden. Akken llan di ttiεad iεeggalen n yikkubar n tsartit, ger-asen mass Moussa Tamadartaza, aεeggal n wagraw n lluma ukabar n tirni iγallen inemlayen(FFS), mass Azouaou akk d mass tiyeb Mokadem, iεeggalen n wesqamu aγarfan aγelnaw(APN) i yettmetilen akabar n tsartit Agraw Aγelnaw n Tugdut (RND) d waṭas niḍen. Tamesbanit-agi yesduri-tt-id uγarbaz amezwaru Bakuc Muḥend Waεmar n taddert n saḥel, anda i yukkan s nnig n 20 n yemzikniyen id-yussan si temnaḍin yemgaraden n lwilaya n Tizi-Wezzu. Ahil id-heggan γef dema d amerkanti yerna d amesbaγur, anda llant temzikniyin ukarmus s leṣnaf-is yemgaraden, timliliyin d isaragen anda id-wwin awal γef azal yesεa ukarmus di temnaḍt leqbayel d wamek ara d-yilli uḥareb fell-as akken ad-teqqim d lγella n lebda, asenεet n zwağ aqbur, d temzikniyin niḍen n lḥirfat ufus, am talaxt, aẓeṭṭa, d wayen icuden γer useḥbiber γef twenaḍt. Dγa tameddit n wass n 23 γuct yezrin, tessuli tezrigt tis ssnat n tfaska ukarmus s yiwet n tmeγra meqren anda i ccnan icennayen meqren n tezlitt taqbaylit, ger-asen Oulahlou, Lekhdar Sennan, Tanina, Hocine Fidili d tarbeεt n ccna n tdukla n taddert n Saḥel, syen tella-d tikci n warazen usebγes i kra n wid yukkan di tfaska-agi. Iswi n tfaska-agi d tikci n tebγest d wafud i wuẓẓu ukarmus akken ad-yenarni yedles n teqbaylit, d tikci n wazal i tgemi. Akken tella d tagnit yelhan i yemdanen akken ad-sεun tamuγli yelhan γef lγella ukarmus d uḥareb fell-as. Leqdic d win iεeddan di tegnatin yelhan nezzah.
Islam Bessaci