Anaẓur/amedyaz SI MOH ad yilli deg Montréal, taɣiwant tameqqrant d temnaḍt n Quebec deg Canada, ad yecnu ass n 09 unbir 2013 deg yiwet n tmeɣra ad theggi tasbeddit Tiregwa. Tameɣra-a ad tili d tiwizi i wakken Tiregwa ad tejmeɛ tadrimt i tezmer ad tqabel isenfaren-is i yeṭuqten mačči d kra. Isenfaren ilmend usnugmu n tmaziɣt. Ge-asen, amedya amezwaru d tamzizelt n tira s tmaziɣt umi tsemma Belɛid At Aɛli (d tajmilt i wergaz-agi ameqran n tsekla taqbaylit). Ẓret ulɣu da http://belaid.tiregwa.com. Amedya wis sin d Lbursat n tizrawin (Bourses d’etudes) i d-tesnulfa tasbeddit Tiregwa i yinalmaden n tmaziɣt deg kraḍ/tlata n Igezdiyen/Lwilayat: Bgayet, Tizi-Wezzu d Tubiret, anda llant tesdawiyin i yesɣarayen Tamaziɣt. Ẓret kraḍ n wulɣuten deg wesmel n Tiregwa: www.tiregwa.org. I waken ad nuɣal ɣer Si Moh, anaẓur-a ifazen, bab n yeḍrisen d tmedyazt icebḥen, rnu-as ṣut ḥlawen d uẓawan ifazen, melmi kan i d-yega yiwet n tmeɣra deg Paris ass n sed 19 Tuber deg Café de la Dance sdat imesfarǧen i d-yussan s tuget. Gar-asen inazuren imeqqranen am Ait Menguellat, Benmohamed, Abdelmadjid Bali, … Snat n swaya i yezzuzen wid/tid d yusan s tezlitin id yesquceḍ seg wayen yesɛa d aqbur, wala seg uḍebsi-ines amaynut, win umi isema Lexla, id yeffɣen melmi kan; ass n 14 Tuber 2013.Atan wayen id yenna umedyaz ameqqran Benmohammed segmi kan id yeffeɣ seg tmeɣra-a: “S lferḥ aya id usiɣ ɣer dagi ad zreɣ Si Moh. Lliɣ seleɣ-as kan. I tikkelt tamezwarut ad zreɣ sdat n lɣaci. Dayen isefraḥen aṭas. Llan deg tmedyazt nneɣ n Teqbaylit wid yettxiḍin imeslayen. Llan wid I ten-ixerẓen. Si Moh seg wid i ten-yettxiḍin, u yettxiḍi tamedyazt akken ilaq. Mkul awal deg umkan-is, kul awal s wazal-is. Dayen yesefraḥen aṭas axaṭer Si Moh d yiwen seg wid id ḥeggun taqbaylit ama deg tmeslayt ama deg tikli, u iḥeggu-d tamedyazt. Lḥaṣul sɛeddaɣ taswiɛt igerzen deg tmeɣra-a”. Ihi Tasbeddit Tiregwa tettak ttiɛad i yimfeǧen n Canada i wass n Sebt 09 Unbir ɣef 19h00 deg yiwet n tmeɣra-tiwizi deg tzeqqa n Theatre le Château, tansa : 6956, rue St-Denis, Montréal. Amiṭru : Jean Talon. Azal : 30$.
Ad nerr lwelha dakken tarbaɛt n lxallat TILLELI n tiddukla ACAOH (www.acaoh.ca) ad cebḥent tazeqqa s kra n tezlatin-nsent. Azenzi ibiyiten ad yilli deg: – SALON DE THÉ TIKJDA : 3880, rue Bélanger, Montréal. Tél.: 514 691-8222
– TRÉSORS SUCRÉS : 3640, rue Jean-Talon Est. Montréal Tél.: 514 223-2174
– Ottawa/Gatineau: 1(855) TIREGWA – 1(613)519-1112
R.At Bucnan