Zik, akken kan ara d-udum tiqit n lehwa tamezwarut, di tallit n iweǧǧiben, imdanen yak ad fɣen ɣer lexla akken ad cerwen lqiɛan n tzemrin-nsen uqbel ad d-yeɣli uzemmur. Ayagi yessishil-asen ajmaɛ n lɣella-yagi. Tizemrin d-yezgan di tlemmast n teẓgi (lɣaba), tteksen-asen-t yak ayen ara sen-d-yasen d aɛewwiq : iḥinṭeḍ, anajjel, tiɛeffert, abuneqqaṛ, azzu, adles, d yemɣan nniḍen d yekren tama n ledra. Tizemrin d yusa-n deg usawen, mi yekfa wefras-nsen-t, xedmen-asen-t aḥeǧǧeṛ, ddaw-nsen-t, s wakal, akken azemmur-nni d iɣelli-n ur yettṛuḥ ara mbaɛid. Akken kra n ledwaṛ, imdanen ak, ameẓyan d umeqṛan, irgazen d tlawin, ad refden tiṣennajin lak d imextafen-nsen akken ad leqḍen azemmur. Tilawin ilaq-asen-t ad kren-t tafejrit akken ad heggin-t imekli ara awin-t ɣer lexla. ṣbeḥ, akken kan ara d-yali yiṭij, lɣaci ad d-efɣen deg ixxamen-nsen. Mkul yiwen anda ara yerr. Wa yettṣubbu ɣer uzaɣaṛ, wa yettali s yinna ɣer wedrar. Iberdan zeɣzɣen, wa yessawal i wa, wa yettṛaǧu wayeḍ. Azemmur, zzik, d tagnitt i yemdanen ur nemzer ara di teɣzi n useggas akken ad mwalin, ad mseqsin ɣef tezmert d tarwa-nsen. Irgazen d nutni i yettezwiri-n ɣer lexla. Mi bḍen ad rnun tirni, ma d asemmiḍ, ladɣa ma tewwet nda deg yiḍ-nni, ad-sbuḥten kran n yesɣaṛen s wayes ara d-caɛlen times uɣur ara qden iḍudan-nsen yerẓa wegris. Mi d-ebḍen yak iɛeggalen n twacult, as mḥajajin i lqaɛa. Mi kfan, ad alin akken ad d-ezwin tazemmurt yellan yuɣ lḥal teḥma. Mi yenṣef was, iṭij di tlemmast n igenni, ad tesleḍ kan i zhir n umextaf d uzemmur m’ara d-iɣelli ɣer lqaɛa, aman yettregrugen deg iɣezṛan, asčewč n yefrax yettferfiren sufella n isekla (ṭjuṛ) d itercucen, d-ittekken nnig n teḍṣa d laɛyaḍ n yemdanen ileqḍen azemmur. Mi urwen-t tzemrin, imdanen xedmen tiwiza gar-asen, akken ad d-jemɛen lɣella-nsen, ttgabaren igelfan n zarẓuṛ, uqbel m’ad d-eɣlin ideflawen.
Zenia T.