Ait Meslayen, d yiwen gar yinaẓuren imeqqranen i d-tefka Tmurt n Leqbayel, i irefden ccna n teqbaylit s igenni n yiseγ deg yiseggasen n 70/80. isem-is n tidet : Benhabouche Idir, ilul ass n 3 deg waggur n Unber (novembre) 1944 deg taddart n Ayt Meslayen, taγiwant (commune) Akbil ; d isem-a i yefka i yiman-is deg umecwar-is n ccna s nnif d yiseγ. Ait Meslayen yenğer abrid-is n ccna deg yiseggasen n 60, mi yella d anelmad deg uγerbaz alemmas (CEM) deg Ʃin Lḥemmam, din i yebda icennu, u yettawi-d tizlatin-is timezwura sdat n yimeddukal-is inelmaden (élèves) i yessewhem ama s taγect-is ama s uγanib-is ; ladγa s yisental-is (sujets) i d-yettawin γef tmetti d tsertit (politique), acku deg tallit-nni teẓmek teswaɛt, ur yeshil ara ad yecnu yiwen ladγa γef tsertit akk d tumast (identité).Deg tallit anda icennayen yecban Matoub Lounes, Ait Menguellet, Atmani d wiyaḍ bdan ad d-ttbin en γef usayes (scène) n ccna, netta yuγ lḥal yessuffeγ-d tisfifin (albums) i yeqqimen d ccama n tsuta-s akked tsuta n wass-a, acku isental iγef yecna : tayri, beṭṭu, lγerba … d isental i iḥuzan aṭas timetti taqbaylit n zik akked tin wass-a. Ur yecni ara kan γef tayri, maca yezzi lwelha-s diγen γer lbaṭel iḍerrun deg tmurt, dγa yecna ‘’Tafunast igujilen’’ akked ‘’Lḥeq yemmut, d lbaṭel i izedγen tamurt’’, akken diγen i yerra tajmilt i tlawin yetmeḥnen akk d yimawlan ɛzizen, d lqerḥ lqayen i d-yettağğa lfiraq-nsen, annect-a yecna-t s ttbut deg tezlit anda γeqqar : ‘’A lmut taγeddart, tewwiḍ yemma’’ ! Aṭas n tezlatin i yecna s taγect-is ḥlawen d uγanib-is ifazzen, swayes yessaweḍ ad d-yeğğ isem-is deg umezruy n ccna n teqbaylit ar tama n yisem n Slimane Azem, Cherif Kheddam, Cheikh Lhasnaoui d wiyaḍ …
Ait Meslayen yessaweḍ leɛfu n Rebbi ass 21 deg waggur n dujember 2000, mbeɛd 56 n yiseggasen n ccna d yinig (exil). Yettwamḍel deg taddart-is, ddaw lemqam n Yemma Tagenturt, anda tella tiddukla tadelsant tanaddalt i yeddmen isem-is, i yuγen tannumi tettarra-as tajmilt yal aseggas.
Gar wayen yecna (Ajenwi) : ‘’Wa ad d-yerren zzman-ik ay ajenwi ; ad ak-nketti ; alama tewwḍeḍ s iγes ; wa ad d-yerren Ʃmiruc ad iwali ; Ḥmed Umerri ; nnif deg tuddar yekkes ; tamurt-nneγ teqqel i lefḥel d ilili ; mi ara t-id-yali wawal ; ad t-neɛzel weḥd-s ; mmuten akk yirgazen iγer nettcekti ; neggra-d nekkni ; ur nemzil ur nemmurḍes’’ …
T Larbi