Seg wass n 24 ar wass n 31 deg wagur n mayu, ad temmag di temdint n Ottawa yiwet n tmesbanit tadelsant tamaziɣt ideg ara yili waṭas n leqdic. Tamesbanit-a umi yettunefk yisem: “ Amalas Adelsan Amaziɣ di Ottawa- Gatineau», i tt-id-yeswejden d tidukla ACAOH akked tesbeddit Tiregwa. Sennig n uḥesses n warraw n yiminigen n tmura n Tmazɣa yellan di Kanada ɣef wazal n useḥbiber d tuṭṭfa deg yidles amaziɣ; tamesbanit-a daɣen ɣef wakken i d-xebbrent snat-a n tuddsiwin i tt-id yeswejden ad temmag ilmend n ussisen n yidles amaziɣ i yimezdaɣ yemxalafen n tmurt n Canada. Am wakken daɣen i ssaramen wid i d-yeswejden tamesbanit-a :” Akken Amalas-a Amaziɣ ad yili d tagnit i usefṛeḥ d usebɣes n yinaẓuṛen-nneɣ d yimeɣnasen-nneɣ ara d-yasen seg tmurt n Tmazɣa, nebɣa axi yakan ad sen-nexdem ccan s tukci n wazal i wayen xeddmen. I teɣzi n sin n yimalasen neɣ kter, nebɣa inebgawen-nneɣ ad sɛeddin taswiɛt n lehna d lisser akken ad steɛfun yerna ad ttun iɛewwiqen i ttemlilen di tmurt-nsen. “ Wa ɛlaḥsab n wulɣu i d-ssufɣent snat-a n tudsiwin i d-iheyyan leqdic i yezmer ad iɣer yiwen d akemmali deg wadeg n tesbeddit Tiregwa: www.tiregwa.org . Deg wahil n tmesbanit-a tadelsant aṭas n leqdic ara yemmagen ama d timzikniyin neɣ d isaragen akked uskan n yisura s tmaziɣt. Ger wayen akka ara yilin ad d-nebder sin n yisaragen ara d-yefk Dr Djaffar Ould Abdeslam ass n 24 mayu deg ludiṭuryum n tesdawit UQO (Gatineau). Asarag amezwaru ad d-yawi ɣef “ Imaziɣen deg umezruy: akkin i yidurar d yirgazen», ma d asarag wis sin ad d-yawi ɣef: “ Tamurt n Leqbayel: ger yidurar d yillel”. Deg wass n 25 mayu, ad d-yili uskan n usaru “ Tamellast” deg ludiṭuryum n tesdawit n Ottawa. Asaru-agi, i yexdem umsufeɣ Chahine Berriche, yeskanay-d udem n lḥif d wuguren n tudert i ttidiren yimaziɣen n tmurt n Tunes. Am wakken daɣen ara d-tili ass n 26 mayu di tesdawit n Ottawa yiwet n temzikkent n tkaligṛafit tamaziɣt ara yexdem umeɣnas daɣen d amusnaw ameqqṛan n tmaziɣt n tmurt n Libya, wa d mass Medɣis Umadi. Timzikkent-a ideg ara d-yesken mass Medɣis Umadi ladɣa tisefsayin n tira s tfinaɣ i d-yessebdeɛ deg yiseggasen-a iɛeddan d wayen akk iga deg ayen yeɛnan takaligṛafit tamaziɣt, ad teqqim arma d taggara n tmesbanit ara d-yilin ass n 31 mayu. Rnu daɣen ad tili deg-s teklut d tanfugṛafit tamaziɣt ara d-seknen waṭas n yinaẓuṛen n Tmazɣa d tmura-nniḍen. Amalas-a adelsan ad yekfu s tmeɣṛa n ccna ideg ara ilin waṭas n yicennayen imaziɣen ara d-yasen seg tmurt n Tmazɣa, Marikan akked Fransa, seg-sen: Lezher Ben Ouirane (Tunes), Ali Abdjaoui (Fransa), Djaafar Ali Mamar (Lezzayer), Tarbaɛt Aza (Marikan), Hakim Kaci (Kanada),… Wid/tid yebɣan ad walin(t) ahil n tmesbanit-a tadelsant d akemmali, neɣ daɣen wid neɣ tid i yebɣan ad zeddin(t) di leqdic neɣ ad d-fken(t) afus n tallelt, tasbeddit Tiregwa tga isebtar ɣef demma ara tafem(t) deg wadeg-is: www.tiregwa.org.
Mokrane Chikhi