Send iḍelli ay kfant tirziwin ɣer yidurar n Takuct ed Isekk, i d-tesuddes Tdukkla Tussnant Takuct (ASET) n Ayt-Smaɛel ussan n Ahad, Amhad, ed Sem-a yezrin, ilmend n wass amaḍlan n twennaḍt i yesfuggul umaḍal merra deg 5 n yunyu n yal aseggas. Deg ttiɛad-a aṭas i yekkin seg tɣemmar n Bgayet, ama d tidukkliwin n uḥareb ɣef ugama neɣ d tidukkliwin tinaddalin, neɣ d tiyaḍ, am tdukkla n yineɣmasen ed yemceyyɛen n Bgayet. Ahil n kraḍ n wussan yella ihi d anesbaɣur s waṭas anida i d-yella uḥewwes ɣer yidurar, asarag ed uskasi, timzizzelt i warrac akked uɛeyyen n tesbaɛt ara yelhun ed uḥud ɣef tẓegwa. Deg ass amenzu, tirza tella-d ɣer udrar n Issek, d adeg i iḍejben akken iwata ama i wallen neɣ i wallaɣ n yiḥewwasen imi i ten-id-ijbed s ccbaḥa-s ed tsusmi-is, d yiwen n umkan i izemmren ad yili gar wid akk yelhan i tmerrit deg Tmurt n Yezwawen. Kra n win iruḥen yesben tagella-s ddaw n yisekla i d-yurwen amalu, mbaɛed ɛeyyu n tikli , imi ulac učči i yettruḥun i umkan-is am win n lexla ladɣa mara yili d aqerwac ara yettwazlun i waya. Deg wass wis-sin tewweḍ-d nnuba i tuffɣa i yellan tetturaǧu war ssber sɣur wid akk terza taluft, imẓuren behten s sser n udrar n Takuct i yellan war ahat d amḍiq n tmerrit, maca ur yettwassen ara, yeffer ɣef yimerrayen. D acu kan, nesḥassef mi t-ssnen akken iwulem wid yettruẓun asaḍuf uqbel ad muqlen i ɣur-sen yiduba (les autorités), acku imezwura-a i d-bedreɣ ḍḥan-d d iɛdawen n umadaɣ-a imi qesfen acḥal d imɣi din, gezmen acḥal d ttjur, tid swayes yesɛa isem ladɣa udrar-a n Takuct. Ma deg wass aneggaru yella-d usarag i d-yewwin ɣef umihi i tettidir twennaḍt-nneɣ. Aselway ilemẓi urmid n tdukkla-a tussnant Takuct mass Ɛebdelkrim Ɛebdun yemla-aɣ-d dakken segmi yuɣal d aqerru deg tdukkla, nnig n uḥud ɣef twennaḍt ed tikli i yidis-is, iswi-is agaɛmir daɣen d asnulfu n yisenfaren n tmerrit i ubaɣur n temnaḍt, n twilayt, ed yilemẓiyen merra akken i iban.
Mhenni Xalifi