… Ɛisa iqeddec seg wul send ad d-taweḍ tegrest iwakken ad yekkes i uεecciw izeɣbuben i t-yeččuren wa ad yessenqes i wayen i d-yettdekkiren s wudem yessemlillayen. “Iweǧǧiben” d tawala (période) n yixeddicen imezwura n lexrif, d akud iwulmen i ccɣel-ayi, akken yella dɣa deg uwitay amaziɣ. Amahil n Ɛisa, itekkes iẓuṛan i yisekla imecṭaḥ i d-yettgaɛmiren, akken ad yeǧǧ tizemrin ad snuffsent, ad ɣeltent weḥd-sent tafukt, aman ed tisent n ddaw wakal. Afras ed uqessel n yigelluyen ilemẓiyen i d-yetteɣmayen war ma ttwaẓẓan, ma d aheggi-nsen i yilmi, d iswi wis-sin n ufellaḥ. Ilili d win i iweεṛen(tenace), s yiẓuṛan-is iɣemqen yettɛawad-d yal aseggas war aɣilif, amadaɣ (lentisque) s yiferrawen yettnettfasen i ssexdamen At uzzal akken ad seggmen iɣeddwan s tsarit n ulezzaz(osier) akked uɣanim (roseau) itekkes listaε i wuzugar(jubier). Adarnu (buisson) wissiɛen yeččur d isennanen, deg umemmay(tamari) akked deg azezzu(gêner) s waṭas n temgerdiwin i imgerraden am uḍaṛḍaq(cytise) i yesεan ccbaḥa n yizeǧǧigen iwṛaɣen. Ma yella d tarzeft n yibelluraǧ tesskanay-d tafsut, tin n uzeṛẓuṛ(étourneaux) teqqar-d belli tagrest (ccetawa) tebda, mara ṭṭfen tafsirt (le littoral) anda azemmur itewwa zik. Kra n lesnaf n yigḍaḍ i itetten s waṭas ttalin ɣer wadeg iεlayen deg ssuma, deg tnasfa n duǧember. taswaεt-a anda isekla i yesrugayen berrun i yiferrawen-nsen ineggura akken ad steεfun deg tsemhuyt ismiḍen, tettusemma «iqeccacen» deg uwitay azwaw.
Yerra-tt-id ɣer tezwawt : Mhenni Xalifi