Ihi akka yewweḍ-d lawan n ukermus. Anwa ur n ḥemel ara agummu-agi? Imezdaɣ n yal tama deg tmurt n leqbayel tteksen-d akermus iwakken ad t-ččen, acku bnin aṭaṣ. Deg tɣiwant n Tazmalt, akermus yesɛa azal muqren deg tuččit n yimezdaɣ. Ttaleqimt usegri, yerna ma yella ṣemmeḍ, awi-d kan i uɛebbud. D acu kan, ur ilaq ara yiwen ad ikeṭṭer deg tuččit-is ! Zik nni, akermus yettmenṭar. Ččan-t medden s tawant. Yal axxam, Yal taddart tesɛa akermus. Tura, yeḥya kelḥiyi, akermus yuɣal yettnuzu am netta am igumma nniḍen! Yuɣ lḥal aṭaṣ n yisekilen n-ukermus i ɣeḍlen medden tagara-agi, dayen yerran agummu-agi yenqes. Zik-nni, ulac leswar. Medden ẓerben ixxamen nsen s-isekilen n-ukermus. Ayagi yerna deg lecbaḥa n tuddar, am akka akermus d-azegzaw ṭul useggas. Tezzin-d ɣef tuddar am umellal n t’mellalt yezzin ɣef ufareẓ ! Akka ihi, imi yella lixṣaṣ-agi n-ukermus deg tɣiwant n Tazmalt, ayagi yeǧǧan kra n yilmeẓyen n tama-agi, znuzun akermus ɣef rrif n webrid aɣelnaw wis 26. Deg tuddar n Tablazt lakked « La maisonnette », id yezgan zdat n webrid-agi, ilmeẓyen srusun ɣef rrif n webrid ibidunen ččuren d-akermus iwakken aten zenzen. Yuɣal am akken d lḥirfa isegassen-agi inegura, imi aṭaṣ n tedrimt id yettawi waya. Abidun amecṭuḥ yettnuzu kra n 100 idinaren, ma d win muqren 200 idinaren. Aṭaṣ n wid yettɛedayen s tkerruṣin nsen, ḥebsen, ttrusun-d iwakken ad aɣen akermus n t’murt. Ilmeẓyen d warrac yeznuzun agummu-agi, ttekren ṣbaḥ zik iwakken ad aččaren ibidunen. »Nek tekreɣ-d ɣef lxemsa n ṣbaḥ akken ad kseɣ akermus. Ttaččareɣ kra n yibidunen akken aten zenzeɣ. Ttawieɣ aṭaṣ n yidrimen. ».Akka i ɣ-d-yenna yiwen weqcic. Lkumirṣ-agi n-ukermus d yiwet n tagunitt i warrac yeqqaren deg uɣerbaz, akken ad ǧemɛen tadrimt swayes ad qablen leqraya nsen. Imi imawlan nsen ur zmiren ara ad ṣerfen iman nsen leqlul n leqraya lakked d-iceṭṭiḍen.
Syphax.Y