Deg tallit-agi n unebdu, tiwaculin ak ttfaṛaṣen tagnit mi d-mmlalen yak iɛeggalen akken ad xedmen timeɣṛiwin. Yal taggara n dduṛt, ttemyagaren-d aṭas n lfuṛuḥ. Deg wakken gten lfuruḥ, mɣent twaculin ɣef wussan nniḍen n dduṛt akken ad sɛeddint timeɣṛiwin-nsent uqbel ad faken wussan n yimuṛas n ixeddamen, n warrac n llakul lak d iminigen ara yuɣalen ɣer yinig. Timeɣṛiwin qwant, imdanen ttaɛwaqen anda ara rren, acku yal dduṛt ttwaɛraḍen ɣer waṭas n yexxamen. Maca ulac win ittcetkin. S tumert, tilawin d telmeẓyin ladɣa sɛeddayent yak ass akken ad heggint iman-nsent. Tameɣṛa d tagnit anda ttemmyagaren yemdanen ur nemwala acḥal aya. D tagnitt daɣen anda tteksen lxiq ɣef wulawen-nsen, ladɣa tilawin ur nettfeɣ ara deg wexxam. Maca illa melmi, akken qqaṛen, tettuɣal tmeɣṛa d amyuqen. Imdanen tikwal tettun iman-nsen, stehzayen aṭas ayen d-yettawin tiwaɣiyin meqṛen yesluɣuyen lferḥ-nsen. Tixeṣṣarin ttilint-d ladɣa deg yiberdan makken ara ruḥen ad d-awin tislit neɣ mi ara d-ezzin. Taggara-agi ladɣa imi aṭas n imensan id d-yettemyagaren deg iberdan, tezga temderka daɛwa ayen d igellun s reffu d umennuɣ ger inehhaṛen. Ula d tuddar ur sliken-t ara i wuguren n weḥbas n tikli n tkeryas sebba n imensan yegten. Imdanen nehṛen akken ufan, ayen d-yettawin s txeṣṣaṛin di cci lak d leṛwaḥ. Ula d irekkaben stehzayen s yiman-nsen. Wa ad tafeḍ isufeɣ-d ameslux-is deg ṭaq n tkeṛṛust, wa isufeɣ-ed aɛenqiq-is deg sqef. Mi d d-ewweḍ teslit s axxam, llan wid isufuɣen lbaṛud. Ayagi d aɣen yesfuguren lfuṛuḥ ma dagella asexdem-is ur yell’ara s leḥder. Acḥal d abrid i ttwaɣen imeḥdaṛ, ula d islan ur sliken ara. ɣef ayagi i qaṛen imezwura, lemḥadra tugar leqḍaɛ. Akken ur yettuɣal ara lfeṛḥ d leḥzen, ilaq bnadem ad d-yerr laɛqel zdat-es.
Fatiha K.