Akken i d-yettban, tasnawit n Maɛuc Idris n Lberj n Mira, i d-yezgan deg tɣiwant n Tsexriwt s wazal n 50 n yikilumiṭren ɣef Bgayet, werǧin temlal-d taswiɛt iḥersen am tin deg tella imir-a. Nnig n ddiq ameqqran deg tesmilin ɣef sebba mi ur thegga ara tesnawit n Ayt-Smaɛel, inelmaden akk itetten yettunefk-asen wahil d amaynut n tgella. Seg tcarit n tesnawit ihi (ugar n 1600 n yinelmaden), llant tesmilin i yettawin almi d 40 d anelmad, ladɣa seg wid iḍefren afurek n tussna. Ma yella d asečču n uɣerbaz, segmi teḥres akken s umḍan (nombre) n warrac umi ur tezmir tasnawit, tamehla txemmem ur tesseččay ara yiwen n wass deg ddurt yiwet n tesmilt. Anect-a, acku segmi caḍen warrac, ixeddamen ufan d awezɣi ad ččen merra deg wakud ilaqen. Ihi tifrat-is, yal ass anta tasmilt ara kksen seg wahil. Seg wuguren nniḍen, llan-d daɣen wid i d-yekkan sɣur warrac i d-yettwaḍeggren seg uɣerbaz. Wiyi llan ssuturen tuɣalin-nsen almi ttagen tiganin (grèves) yal ass. Aɣilif-a idum kra n wussan almi i d-yesuddes unemhal n tesnawit anejmuɛ akked uselway n tɣiwant n tsexriwt ed yibabaten n warrac. Mi sqerdcen awal ɣef taluft yellan, ssawḍen i ugemmuḍ igerrez acku seg wass-nni tsemmed tɣuri deg tesnawit am dima. Tiganin llant ḍurrent akk inelmaden ladɣa wid n uswir wis-kraḍ i yesɛeddayen BAK, acku akken i d-tenna tneɣlaft n usegmi, BAK n useggas-a ibeddu mara yebdu useggas skud ikraḍyuren (trimestres) merra, ad ttwiḥesben deg leḥsab aneggaru. Ihi yal akayad s wazal-is seg tura ma bɣan meqqar warrac ad rren ddhen-nsen seg tura ugar i tɣuri-nsen. Akken i t-id-nenna tazwara, aḥcar-a yakk yella-d imi ur tewjid ara tesnawit n Ayt Smaɛel akken ad tesduri tarwa-s i yeɣɣaren deg tesnawit n Maɛuc Idris. Asenfar n tesnawit n Ayt Smaɛel yettwajerred ugar n 6 n yiseggasen ɣer deffir, maca ar tura werɛad tekkis, meḥsub ala 60% seg lecɣal i yemuggen ar ass-a. Aselway n tɣiwant n Ayt Smaɛel yenna i tiliẓri Djayer Tv dakken tasnawit-a tɛedda-d seg waṭas n yiɣilifen, ma yella acimi ur thegga ar tura akken i d-yewwi lḥal, ɣef leḥsab-is, acku yal yiwen ixeddem ayen i as-yehwan war ma yella d amasay (responsable). Tinermisin (entreprises) merra i d-iɛeddan syinna ur d-wwint ayen yellan yetturaǧu deg-sent. Ɣef waya, imḍebren n tɣiwant ufan ur d sswab ad ldin tasnawit i yiwen n uswir neɣ sin, netta iqeddicen mazal tsemmiden dinna. Taɣellist n yinelmaden tezzwar takkit, ɣas ma tḥeyyiren s waṭas rnu tebɛed cwiṭ tesnawit deg ɣɣaren tura. Ad d-nefk aneɣmis belli tasnawit n Ayt Smaɛel ad theggi d abrid i qabel akken i aɣ-d-yenna uselway n tɣiwant.
Mhenni Xalifi