« Nɣaz » deg tmektayt nneɣ akken ad nessufaɣ sin n yemdanen yemmuten tura, akken ad asen-er tajmilt. Wigi, zik nni, llan d-iɛeṭṭaren i zedɣen deg taddart n’At Buɛli id yezgan deg tɣiwant n At Manṣur (Tubiret). Wigi d N’na Taxrucatt d ɛemmi Menad aderɣal. Sin iɛeṭṭaren-agi, ɛacen, ɛeycen widak nsen, s-uznuz n laḥwal. Ttruḥun seg taddart ɣer tayeḍ, akken ad zenzen ayen i d-ewwin. N’na Taxrucatt, d yiwwet akken n temɣart muqren deg tallit nni n yiseggasen n 1980. (Temmut waqil deg taggara n tmanyin). Tamɣart-agi, tedla ɣef tuddar yezzin ɣef At Buɛli, tettruḥu ar yixxamen akken at-zenz ayen i d-tewwi. N’na Taxrucatt ḥemlen-tt akk medden, yagi tilawin acku teḥdaq dayen kan. Tesɛa nniya, netta-t yuɣ lḥal tekka-d seg tuttwin n zik nni. Teznuzu deg yixxamen cciḥ, lkuṣbar, lḥenni, ticert, ifelfel anaɣdan d-uberkan, naɛnaɛ,…lḥaṣul mači d yiwwet ar ad nebdar. Necfa-yas-d akken, nekni meẓẓiyit. Ass mara tekcem ɣer yixxamen, tettawid lfarḥ d ttaḍṣa i t’lawin ur n ttefeɣ ara. Ttɛuzzun-tt, ḥemlen-tt. Asmi i temmut N’na Taxrucatt, yeɣli-d laḥzen ɣef yixxamen. Tilawin nni dayen ulac war asen-d yawin laḥwal nni i ḥemlen-t. Segmi i temmut temɣart-agi, deg taggara n 1980, ulac tamɣart nniḍen yewwin amkan-is. Aɛeṭṭar wis sin, d yiwen akken n-uderɣal, iwumi ssawalen ɛemmi Menad. Wagi yugar kra yella-n d-aɛeṭṭar, acku netta d-aderɣal yedlan ɣef tuddar i qarben taddart n’At Buɛli, am Tawrirt d B’ni Manṣur. Ɛemmi Menad, d-amezruy. Amɣar-agi, yemmut ahat kra n 10 iseggasen aya kan, d-aɛeṭṭar aneggaru n tama n’At Manṣur, waqil n tama n Saḥel akk! Am N’na Taxrucatt, wagi yeznuzu aṭaṣ n laḥwal. Yettruḥu-d seg At Buɛli alarmi d B’ni Manṣur ttikli ɣef iḍaren-is mebla ma yedda ula d yiwen yides ! Allen-is ttaɛekkazt-is ay at laɛraḍ. I teddu azal n 4 ikilumiṭren akken ad yezenz deg taddart n B’ni Manṣur. Yeznuzu ticert, lkuṣbar, cciḥ, lkemmun, ttay, tizan,…s ubarreḥ deg zenqan! Sellen-as-d medden seg lbaɛd, imi taɣuct-is teqwa dayen kan. Amɣar-agi iceffu d laɛǧeb. Iɛeqqel akk medden s tuɣac nsen kan. As yahḍar kan yiwen at yaɛqel din ! Mti i yeznuzu ulayɣar ad yaɛreḍ yiwen as i kellax , acku ɣas akken ma yella ur yettwali ara, ifassen-is i d-allen-is. Yezmar ad yaɛqel idrimen s yiḍuḍan-is kan ! Ḥemlen-t akk medden, ulac win yewten at yaɣḍar, acku d-aderɣal i xeddem ɣef ccar-is. D’da Menad d win yettecmummuḥen kan, yettaḍṣa, acku ul-is d-amellal. Maca, mači d-ayagi kan i yaxdem Menad, yettawi ula d ttibratin i yimezdaɣ n’At Buɛli. Yettruḥu ɣer lbuṣṭa n B’ni Manṣur(tawilayt n Bgayet) akken ad yejmaɛ akk tibratin akken aten-t yawi ɣer taddart n’At Buɛli, taddart-is. Asmi yemmut D’da Menad, yaɣli-d laḥzen ɣef tama-agi. Deg zenqan n tuddar yekfa uberraḥ ines. Akka ihi, ruḥen iɛeṭṭaren n’At Manṣur, « truḥ-as » lbenna i teccuyt…N-ella akken ad nesmekti !
Syphax.Y