Ideflawen d igefran id-yeγlin s lejhar d tuget d wid id-yeglan s deqs n wugguren, iγeblan, iεewiqen d twuγa meqren deg yibardan yegarden n tmurt leqbayel.
Dγa, ass n 24 furar 2015 yezrin, teḍra-d yiwet n twaγit meqren deg webrid n wawqas di lwilaya n Bgayet mbaεd aγelluy n yedγaγen naγ iẓra meqren deg wedrar-agi n Uqas sufella n ṭumubilat, dayen id-yegla s lmut n 07 n yemdanen d nnig n 15 n yimejraḥ. Mbaεd 48 n tsaεtin γef tedyant-agi, teḍra-d twaγit niḍen deg webrid n Taxuxt lwilaya n Tizi-Wezzu, anda id-γlin yedγaγen imeqraren deg webrid-agi γef 02:00 n sbaḥ, yeṭṭef yiwet n ṭumubil ideg llan 03 n yemdanen, ḥamdullah selken si lmut maca jarḥen.
Akken igezmen deqs n yibardan niḍen i uεeddi, am webrid n uzaγar icuden ger tγiwant n Wizgan d Bubhir di tama n wasif n uzaγar sebba n wenfal n waman nnig tqeddert-agi. Akken i yuεren ibardan niḍen i uεeddi, am webrid n lwilaya uṭun wis 251 i cuden ger Wizgan d Yifiγa, seba n uγelluy n yeẓra s waṭas di tama n tewwurt, akken id-ibban weγbel-agi deg webrid aγelnaw uṭun wis 72 icuden ger Yiεeẓẓugen d Σin-Lḥemmam, di tama n At-Buεḍa sebba n wesyax id-ibanen deg acḥal n yiseggasen-aya.
D iγeblan iwmi sḥasfen aṭas yemsebriden yettawin yal ass ibardan-agi, anda isutren deg yemḍebren taεna temsalt tifrat i γeblan-agi merra i wḥareb γef tudert n yemdanen.
Islam Bessaci