Uqbel tirza-ya n yixeddim, mass Amara Benyounes s yisem-is d amaray amatu n ukabar n Umussu Agdudan Azzayri (MPA), yexdem timlilit akked yimeɣnasen n ukabar-is anda i d-yefka awal ɣef waṭas n temsal icudden ɣer tsertit n tmurt. Timlilit-a i d-yellan tameddit n wass n laṛebɛa 18 meɣres, usan-d ɣur-s aṭas n yimeɣnasen n ukabar seg yakk tiɣiwanin n lwilaya n Bgayet. Deg awal i d-yefka i yimeɣnasen n l’MPA, mass Amara Benyounes yerra di tazwara tajmilt i yimeɣrasen n tegrawla taɣelnawt ladɣa ilmend n lɛid n ternawt ( 19 meɣres). Yesmekta-d wid iḥeḍṛen s umennuɣ n yimezdaɣ n temnaḍt n Leqbayel ilmend n tlelli n tmurt imi tamnaḍt-agi tezga d nettat i d adif n Lezzayer : « Ulac tamurt n Leqbayel mebla Lezzayer, ulac Lezzayer mebla tamurt n Leqbayel », i d-yenna deg awal-is. Mass Amara Benyounes iwekked-d deg awal-is ɣas ma d ṣṣeḥ tamurt n Lezzayer mazal tettemlil uguren maca : « Tif aṭas timura n Tmazɣa i yaɣ-d-yezzin », anda iwehha ɣer Tunes d Libya i yenhewwalen segmi i d-iɣum fell-asent wayen umi semman « tafsut taɛṛabt ». Ɣef temsalt-agi daɣen, mass Amara Benyounes yesmekta-d s tixuṭṭert n umennuɣ aserti imi d netta i d lsas n tugdut, amennuɣ ideg d-yewwi ad gtent tmuɣliwin mačči ilmend n uhuddu n tmurt maca ilmend n lebni-s. Ɣef waya, deg awal-is yefka-d tiɣri i wudmawen n tsertit n tmurt ur nelli ara deg udabu akken leqdic-nsen ad yebnu ɣef tdukli d usibɛed n tmuɣli ilmend n lmaṣlaḥa n tmurt n Lezzayer. « Mačči win i wumi ɛeṛqent ad iṛuḥ ad d-yessufeɣ ilmeẓyen ɣer ubrid. Tasertit ilaq ad tbedd ɣef wahilen iṣeḥḥan d tɣimit ɣer ṣṣwab. Ma d wid yenwan abeddel ad d-yekk seg tuffɣa ɣer ubrid ɣelḍen, nwala acu i yeḍran di tmura taɛṛabin ideg teɣli ddula, ufan umbeɛd abrid yimeṭṭuṛfa akken ad ldin abrid n ccwal war tuɣalin». Dɣa ɣef tneqqiḍt-a n tuɣalin n yislamawiyen imeṭṭurfa ɣer unnar aserti di Lezzayer, iḥedder-d kra n yikabaren d wudmawen n tsertit i yettnejmaɛen yid-sen, ɣas ma ẓran dakken at Icumar-agi zgan ttilin d ugur i unegmu n tmurt. Da mass Amara Benyounes yefka-d amedya n tuffɣa-nsen mgal n tukci n yizerfan i tmeṭṭut ɣas ma ddula tazzayrit tger asurif di temsalt-a, iswi ɣer zdat d aseɛdel gar-as akked urgaz am wakken yella lḥal di tmura yetqeddmen. Nnig n waya, mass Amara Benyounes yemmeslay-d ɣef waṭas n temsal icudden ɣer tsertit n tmurt, ladɣa tamsalt n usufeɣ n lgaz n uẓrar anda i d-iwekked dakken aya ur yelli ara deg wahil n udabu di teswiɛt-a ideg nella.
Mokrane Chikhi