Deg ass n 19 meɣres, yerza-d ɣer lwilaya n Bgayet uneɣlaf n tenzut mass Amara Benyounes anda i yessefqed aṭas n yisenfaren icudden ɣer tdamsa. Tirza-agi i d-yeɣlin deg ass n usmekti n lɛid n ternawt (19 meɣres 1962), ifures deg-s tagnit mass Amara Benyounes akken ad yerr tajmilt i yimeɣrasen n tegrawla n tmurt d yimeɣrasen n tugdut. Deg Usebded n Umeɣras n temdint n Bgayet, mass Amara Benyounes yessers tamuqint n yijeǧǧigen, yerna daɣen yeḥḍer i tmeɣra tamezwarut n tfaska tis tesɛa n ccna agrawliw n yilmeẓyen i d-yettilin yal aseggas di lwilaya n Bgayet. Mbeɛd tajmilt i iga i yimeɣrasen, mass aneɣlaf n tenzut, yessefqed ɣef yisenfaren icudden ɣer uḥric n tdamsa anda i yeldi yiwen n ssuq yellan tama n ubrid n Wawras, yerna daɣen yessefqed ɣef lecɣal n useggem n ssuq n ujemmal yellan di Sidi Ɛli Lebḥer. Am wakken daɣen i yeldi axxam amaynut n tenmehla n tenzut yerna yessefqed ɣef ssrabes d tdeblin-nniḍen icudden ɣer uḥric n tenzut di lwilaya am labuṛatwaṛ CACQE yellan deg ubrid Krim Belkacem. Di tirza-ya daɣen, mass aneɣlaf n tenzut yessefqed ɣef tkebbaniyin timeqqranin yellan di lwilaya ama d CEVITAL neɣ takebbanit Ifri yellan deg tɣiwant n Wawzellagen d tkebbanit n yisufar n uyefki Soummam yellan deg Uqbu anda yemlal d yimḍebbren d yixeddamen n tkebbunay-agi yerna yesla i yiɛewwiqen d wuguren i ttmagaren di lxedma-nsen.
Mokrane Chikhi