Akken iban, sed aneggaru n wayyur n meɣres yezrin i tettwaseqqef tfaska n tmedyezt tamaziɣt deg Udrar n Fad s tikci n warrazen i yimedyazen i d-yufraren deg tecwawt n umḥizwer. Dɣa nella nefka-awen ttiɛad i wass-a i wugar n yineɣmisen. Deg wayen yerzan tameɣra n ccna, yewwi-d ad d-nini dakken tga-tt Malika Dumran lwaḥi ed win i d-teɛreḍ, anaẓur Waɛzib Muḥend Ameẓyan, war ma nettu acennay n taddart mass Wali Ɛebdelɣani. Ma ɣef yimedyazen i d-yufraren, ad d-naf Kaṭiya Tuwwat tewwi arraz amezwaru, mass Yunsi Mulud i d-yerzan seg waɣir n Seṭṭif isaḥ-as-d warraz wis sin, ma yella d ilemẓi n Saleḥ Luni yettunefk-as warraz wis kraḍ. Arraz n tmeṭṭut d win i teddem Buciba Fatiḥa, win n tantala yuklal-it Seḥrawi Ɛebdelwehhab. Ma yella d arraz n yilemẓi tḥella-t-id Tumert Masisilya, win n yimezgi yeggra-d gar yifassen n Neccaf Muḥemmed, ma d arraz n umɣar yuɣal-d i mass Saɛid Fellag seg Tizi. War ma nettu, yuɣ lḥal, arraz n uzayez i d-yennulfan ilindin, ed i tefka tesqamut n yimedyazen aseggas-a i umedyaz Kassa Taɛerkubt. Deg temlilit daɣen, tettwar tejmilt i yiwen n uɛeggal urmid n Tdukkla mass Yusef Azemmur.
Nnan-d ɣef tfaska
Katiya Tuwwat (arraz amezwaru)
Ttḥulfuɣ i lferḥ d ameqqran, d ameqqran armi ahat ur zmireɣ ara ad t-id-weṣfeɣ s imeslayen, farḥeɣ-asen ugar i yisefra-inu imi d awal-nsen i yewwin araz mačči d nekk. Nekk ɣef wakken walaɣ yuli uswir n tmedyezt deg Udrar n Fad. Tidukkla Tadelsant Adrar n Fad d leqdic, d amennuɣ, d tirrugza, d tayri, d ccbaḥa, d tilelli, d asirem, d taqbaylit… ».
Mulud Yunsi, ( arraz wis sin )
« Taqbaylit i yewwin arraz imi d nettat i d iswi n tsekla ideg nqeddec, ma d Tiddukla Adrar n Fad d aɣerbaz n leqdic aseklan imi ass-a, yewweḍ yisem-is ɣer tɣemmar n tmazɣa..Zemreɣ ad d-iniɣ tezger asawen yessefcalen s lexsas n wallalen… ».
Saleḥ Luni ( arraz wis kraḍ )
« Cerheɣ aṭas mi wwiɣ arraz di tikkin-inu tamenzut di tfaska n tmedyezt acku yuli deg-s uswir aṭas. Ad snemreɣ iɛeyyalen n tdukkla Udrar n Fad s umata ɣef leqdic-nsen ama d aselway ilemẓi Fares ama d Sadeq REBBAƐI, akked yimezdeɣ n At Smaɛel merra».
Mhenni Xalifi