Ṛamḍan, atan i bedded ɣef tewwurt. Mazal kan kra n wussan akken ad « yaweḍ »! Deg waggur agi i tettili twizi gar yemdanen, akken ad sɛeddin aggur-agi n « laẓ » akken ilaq lḥal. Aṭaṣ n twaculin tettaṭaf-itent tugdi, acku ẓrant belli ilaq-asent tadrimt, yerna s waṭaṣ. Ayagi, mačči akk tiwaculin yesɛan allalen akken ad qablent sidna Ṛemḍan, anda sṭuqutent tuččiyin. Ihi akka, tiwizi ilaq ad tili gar yemdanen i lmend n igellilen, akken ad ččen akken ilaq. Deg tama n Iɣil Ɛli, i d-yezgan deg unẓul n t’wilayt n Bgayet, yennulfa-d akken yiwen usmil (comité) i cudden ɣer « Agur Azeggaɣ Azzayri » neɣ le Croissant Rouge Algérien. Ɣas melmi kan, asmil-agi yelli tawwurt-is deg yiwen wemkan iwumi ssawalen « Jeddi gaḥtut », deg Iɣil Ɛli. Imdanen-agi bdan leqdic nsen s t’ɣiwla, imi jemɛen, i tikkelt tamezwarut kan, azal n 110 iḍellaɛen yettuferqen ɣef yigellilen, d ttuǧǧal akk d yigujilen n tama-agi. Dayen yessefraḥen aṭaṣ, yerna imezdaɣ n t’ɣiwant n Iɣil Ɛli nḥafen aṭaṣ, imi tiwaculin ur ellin-t ara deg liser akkit ! Agur-agi azeggaɣ yewwi-d yides « tiwizi » i yigellilen d yimaɛḍar n Iɣil Ɛli. Akka, tezmer attgerrez teswiɛt, imi tagmatt lakked d lemɛiwna yennerna azal nsen deg t’metti. Akken yebɣu yeṣɛeb Ṛemḍan, tiwizi at qabel akken ilaq. « Dayen i yessefarḥen dayen kan, ass-mi id d-yeffeɣ usmil (comité) n Uggur Azeggaɣ deg t’ɣiwant nneɣ. Mači ɣas d ttuččit kan i ferqen, ula d dwa lakked d yiselsa i yigellilen d yimaɛḍar n t’ɣiwant nneɣ. S-yillu ar ferḥaɣ i kra dayagi ! » akka iɣ-d yenna yiwen n-umezdaɣ n tama-agi n lɛarc n-At Ɛebbas. Akka ihi, Agur Azeggaɣ n-Iɣil Ɛli yebda i « leqqeḍ », ussan-a, tuččiyin lakked yisufar ilaqen akken ad sɛeddin medden ur nesɛi ara aggur n Ṛemḍan akken ig laq lḥal. D-acu kan aɣbel n usmil-agi « Azeggaɣ » yella-d ɣef ayen yeɛnan aṣiweḍ n yisufar n-učči (Transport des denrées alimentaires). Asmil-agi ur yesɛi ara takerrust akken ad yessiweḍ isufar i yigellilen n t’ɣiwant i zedɣen deg tuddar i baɛden, am Taẓla, El Qelɛa, Buni, At Sraj, Tabuɛnant d tiyaḍ. Maca, agnu-agi ur yeswexxir ara ɣer deffir irgazen-agi yesnen d-acutt t’wizi lakked tagmatt !
Syphax Y.