Dda Muḥand, ameṭraḥǧi aneggaru n lɛarc n'At Ɛebbas !

Partager

Ayen yella-n d-aqbur yesɛa azal, ɣas ma yella ḥeqrent medden tura. Wigi d lḥirfat n zik nni i ruḥen ttwattun-t. Acku tatrara tewwi-d yides « daɛwessu » lakked tatut yewwin kra yella-n n zik nni. Lḥirfat-agi n-ufus ttruḥun-t yiwet yiwet, ḥaca ma negren-t! Ayagi, mači dayen yessefraḥen, imi nebra i yigerruǧen n leǧdud iɣ-d ǧǧan. Maca, nukni ur nessin ara azal n waya, imi iɣ iruḥ akk ayen nessen. Maca, llan kra n yimɣaren mazal-iten ṭfen deg lḥirfat nsen ɣas akkeni ur ssarbaḥ-ent ara bab-is tura, deg tallit nneɣ, anda kulec yuɣal d timacinin lakked d-irubuten. Nesɛa akken yiwen n-umedya: D yiwen umɣar akkeni yesɛan azal n 85 iseggasen, yerna mazal-it yeǧhed. Mass-agi, yuklal taǧmilt s wazal-is, imi ɣas akken muqqer deg laɛmar ifassen-is mazal-iten ttxiḍin, gezmen, feṣlen…timeḍraḥin n taḍuṭ (Les matelas traditionnels). Akka ihi, D’da Muḥand nufat-id yiwen wass deg t’ḥanut-is yettxiḍi imeḍraḥen n taḍut i kra n yimdanen. Yesɛa taḥanutt deg taddart n Ginduz, yella-n d-aqerru n t’ɣiwant n Ayt Ṛzin, ibaɛden azal n 85 ikilumiṭren ɣef Bgayet tamanaɣt n t’wilayt. Ass-mi i neẓra amɣar-agi i xedem timeḍraḥin ur n-umin ara, acku nenwa belli lḥirfa-agi tenger. Ulac ass-a win i xedmen timeḍraḥin s-ufus, acku medden akk ttaɣen-d tid n luzinat. Mi nekcem ɣer umɣar-agi nufa yeǧhed, ifassen-is txiḍin. Yenna-d : »Akken tettwali-ḍ d nek kan i d-yugran ixedem timeḍraḥin n zik nni deg tama-agi n’At Ɛebbas. Ɣuri 85 isegassen, maca ur bɣiɣ ara ad ḥebseɣ lḥirfa-agi n baba lakked jeddi! ». Neseqsa-t ɣef arraw-is ma yella refden asafu n senɛa-ines, D’da Muḥand yenna-d : »Ulac ! Arraw-iw ur ssinen ara lḥirfa-agi. Acku, ass-a ur tettɛeyic ara bab-is… ». Ih akka, zman aɣeddar. Ulac yiwen ger yilmeẓyen ilemden lḥirfa-agi taqburt yesɛan acḥal d leqrun, akken attkemmel abrid-is. D’da Muḥand mači d lǧahel, ɣas m’ur yeɣri ara, maca yesɛa ifassen ugaren kra yella-n d ttussna. Amɣar-agi ur ixedem ara kan imeḍraḥen, ixedem ayen nniḍen am icwariyen, tibardiwin i yiɣuyal, tiqfacin, igertyal,…lḥṣul mači d yiwet n lḥirfa i yesɛa deg ifassen-is n-uraɣ. Ma yella d nukni, neqqim nezza, imi ayen yessen akka D’da Muḥand at yawi yides ɣer uẓekka ass ma yemmet (nessaram-as tuɣzi laɛmar !!). Atan anda yewweḍ yidles nneɣ, iwumi iruḥ ula…d-rruḥ !

Syphax Y.

Partager