Ayen tettidir tmurt-nneɣ d ayen yeshissifen s watas. Tugett n yelmeẓyen, ɣran neɣ ur ɣrin, ur ten-id-iṣah ara uxeddim. Llan kra ɣran, kfan-tt, imi ulac axeddim s waya, terraten tmara ad sxedmen lǧehd n yiɣil, deg lebḥayen neɣ deg icantiyen, akken ad d-hellin amesruf n lǧib-nsen. Ma d wiyyaḍ rwan alaweḥ deg iberdan. Ala wid yesɛan ifassen ɣezzifen i yselken i wugur-agi yeswan, ar almi d iɣes yedren, adif n yelmezyen d telmezyin. Tineggura-agi thuzaten-t taluft s watas, acku ma ur xdimen-t ara s wayen ɣran-t ur ten-t-id-isuh ara ad fɣen-t akken ad xedmen-t deg leqhawi, rrasturat neɣ tiḥuna. Tineggura-agi tteqsadent-ent tullas, maca maci yak tiwaculin ttɛemmiden-t i ddarya nsen-t ad xedmen-t deg-sen-t. Ilmezyen, ɣef ayeg ttsenniden-t yak tmura akken ad snernin-t tdamsa-nsent, ad sǧehden-t tasertit-nsen-t, w’ad fken afud I wnegmu deg yak yehricen, ur sen-efkin ara imḍebren n tmurt-nneɣ azal uklalen. Ttwarekḍen am nutni am izerfan-nsen. nefɛen kan i yiwet n lḥaǧa: llarmi. Ayagi ur tettettun ara. D lmuḥal. Ala tagi i d-tagnitt anda imḍebren teɛna temsalt sanagen-d ilemzi anda yella. Yiwen ur sen-yetteɛraq. Assen mi-ten-hwaǧen zran anda ara rzun akken ad ten-id-afen. Zran daɣen kulci fell-asen. Anda d wamek ttidiren, laɛmer-nsen, d wayen yak icudden ɣer tudert-nsen.
Mi kfan ceɣl-nsen, wid yerran I teɣri-nsen, ad uɣalen ɣer ṭlam-nni anda iten-id-ufan. Akken ara sḥruruden iman-nsen alam ten-t-eǧǧa temẓi d tezmert. Xas akken tugett deg-sen tteɛraḍen yak timsal akken ad bedlen ayen yettwaferrḍen fell-asen, maca ddeqs ur nessawaḍ ara ad d-efɣen deg tɣerɣert anda weḥlen. Llan ula d wid yerran tilest i tudert-nsen. Yella melmi d tamrart, neɣ d timest lak d wayen nniḍen uɣur ttarran lwelha nsen mi walan d akken asmi ala tettceddu tkerres. Wiyyaḍ ttarran lwelha-nsen ɣer tmura n l’Europe. Ugur d akken ulac amek ara fɣen. D illel I d asirem-nsen. Maca atas deg-sen isettiten uqbel ad nesfen abrid-nsen. Ayagi maci d aɣbel i kra. Ar ɣursen ya ad d-eddu ya ad d-eqres. Ma yedda yidsen zher-nsen ad sawḍen ad sarwlen iḍarren-nsen s yagi, ma ulac ad fken iman-nsen d asfel i yselman, akka xersum ad yekfu ddel fell-asen i lebda. Ilmezyen n tmurt-nneɣ nṭerren s watas, dawa-nsen attan ger ifassen n wid yetfen adabu. Zemḍen-tt deg ifassen-nsen akken ilaq. Axir ad ttwalin agdud yettemrurud deg laẓ d ddel wala ad s-efken afus akken ad ibeddel tudert-is.
Fatiha K.