Itikkelt tis snat, “Tidukkla n Bab lxir” n Ayt Sidi ∑li, tessawed ad theyyi yiwet n tmeɣra yesdduklen atas n tirmad n lxir deg wahil-is. Tameɣra-yi, tella-d s tallelt n yi¥allen n lxir, Leqdic agejdan i d-ittuhyan i ssehra-yi d lextana neɣ d ṭṭhara n warrac n twaculin ur neskfi ara iman-nsent, deg temnaḍt-a n Yiberbacen. Tidukkla–ayi tessaweṭ ad tessewjed neɣ ad tessuddes i lextana n wazal n 35 n warrac deg tɛecret taneggarut n Remṭan ; akken i d-aɣ d-tenna Massa Dihya lɛemrani (d taɛeggalt neɣ d timṭebert n Tidukkla-yi). Ṭṭhara-yi tella-d baṭel deg sbitar n «Le Rameau d’olivier», s tallelt n Mass Nait Ali lbachir, anemhal n sbiṭar-a. Aṭas n tirmad i d-yettuhyan i ssehra ilmend n tmeɣra-yi. Tazwara, seld neɣ membeɛd aserḥeb s kra n win i d-yerzan ɣer din d tiwaculin n yimeṭhar, d yimḍebren yemxalafen, neɣ d yineɣmasen tameɣra tebda s ccna. Gar yicennay-a n Yiberbacen i yebdan ssehra : mass Ainsri Salim, Nadjim Alouache i d-yewwin aṭas n tezlatin, ayen yesferḥen, yeszhan inebgawen iḥedren din. Syin, tkemmel ssehra s urar n yiwet n tceqquft n umezgun “SSber n uẓawali” i d-tesewjed terbaɛt n Lḥemmadiyin. Taceqquft n umezgun : “ssber n uzawali», d tin yura umeskar Oueret Zahir d yiɛegalen n ugraw-is, yal yiwen s yisem-is : Hakima Abbas, Laalaoui Wisam, Aadjelia Fareh, Ammaruc Yanis, Aabas Belaid, Idri Said, Boutekka Abed Elhadi. Asentel iɣef i d-tewwi tceqquft-a d tanifit yekkan nnig tẓawalit, d ayen icudden s waṭas ɣer wayen ttidirent d lḥif d tinneɣnit twaculin yenḥafen deg tmetti. Imi, ɣas akken, aṭas i yettseddiqen i yigellilen maca, deg tegti, aya i wakken ad d-sseknen kan iman-nsen, annect-a d ayen i yettḍurun tiwaculin s tidet, yetthuddu akter ma yebennu. Taceqquft-a tessmektaya-aɣ-d daɣen, s teqbaylit-nni n Leqbayel, s yimenzayen-is : am uɛiwin, tanifit, atg. Ɣef ttawilat n lxedma-nsen d wadeg anda qeddcen yinaẓuren-a, mass Ouret Zahir, yemmeslay-aɣ-d ɣef lixsas n ttawilat imi ur sɛin ara ttawilat ilaqen akken ad xedmen ladɣa i wallus n tcequfin-nsen. Ɣas akken agraw-a yebda seg 2001 maca, ar ass-a ur isɛi ara ttawilat i asen-ilaqen am wadeg anda ar xeddmen lxedma-nsen. Seg wadeg ɣer wayed, ggran-d deg yiwen wammas i asen-d-tessummer massa Aissou. D acu kan imi, d ayen i yeḥemmlen, mazal-iten ttkemmilen deg ubrid-a n tẓuri, annect-a iban-d deg ssehra imi wweḍen ɣer yiswi-nsen s usiweḍ n yizen i yimdanen tikkelt s taḍsa, tikkelt s cwiṭ n ddrama. Tidukkla-yi n bab lxir tefka daɣen, arazen i wid i d-yufraren deg yikayaden n uɣerbaz amezwaru, uɣerbaz alezmmas, d wid n BAC. Tameɣra, tkemmel almi d rrebɛa n ssbeḥ s waṭas n tirmad-nniṭen yemxalafen ; d ayen i yessferḥen akk tiwaculin-a d warrac-nsent. Aselway n tidukkla-yi Mass Zahir Tabia yemmeslayaɣ-d ɣef waṭas n tirmad n wahil n tidukkli-ayi ama d ayen yettwaxdmen ussan-a yezrin neɣ d ayen ara yettwaxdmen deg wussan i d-iteddun : aḥelli n kra n «les formations» am useḥfeḍ n lgaṭu deg uxxam n yidles n Yiberbacen ara yebdun seg Ctember i d-iteddun i tlawin i ibɣan ad iḥefḍen lḥirfa-yi ; asiweḍ n «Qufat ramadan» i waṭas n twaculin i tt-yuklalen ; asewjed n “Qufat lɛid” ; asewjed n tmeɣra i rebɛa n yislan deg Tuber i d-iteddun …atg. Ɣer taggara, nezmer ad d-nini, belli leqdic-a d ayen i yezmren ad yezeṭ tagmat, tadukkli, tallelt gar yimdanen, gar yimezdaɣ n yiwet n taddart, n temnaḍt. lxir, dima yestabaɛ deffir-s lxir ; a win yufan ad tili yal aseggas ama axir !
K.R