Durt iɛeddan i d-teḍra tfaska tis6 n uẓeṭta neɣ taferṣadit n Ath Hichem deg uxxam n yidles Mulud Mɛemmri deg Tizi Uzzu. Tafaska-agi, tella-d i tikkelt tis snat berra n taddart n Ath Hichem. Ayagi ur yessefreḥ ara imeskiniyen d tmeskiniyin i yellan deg tfaska-a imi ur yelli kra n lfayda i asen-d-yuɣalen seg tirza-agi ; ur senzen, ur steɛfan. Acu kan, tamsalt n usenzi d wa i d ugur ameqqran ɣef teɣzi n useggas n tnaẓurin-a. Ɣef waya, dɣa, d wayen-nniḍen i nestaqsa Massa LAKROUT Ghenima, nettat yellan d tanelmadt deg lḥirfa-a, syin tuɣal d taselmadt deg uxxam n lḥirfan n Boukhalfa.
Aɣmis n Yimaziɣen : amek i d-tufiḍ iman-im d tanaẓurt ?
Massa LAKROUT : lliɣ ḥerceɣ deg uɣerbaz, meɛna mi walaɣ yemma txeddem aẓeṭta u tettḥellay-d idrimen yis-s, ihi, nniɣ-as i wacuɣer ara ɣreɣ ? Ad refdeɣ kan lḥirfa-agi n yemma asmi ara tt-tessers. Syin, kecmeɣ ɣer uɣerbaz n lḥrfat n Ath Hichem, lemdeɣ lḥirfa-agi 3 n yiseggasen. Akka i bdiɣ aẓeṭta armi d aseggas n 2000, uɣaleɣ d taselmadt deg uxxam n lḥirfat n Boukhalfa deg Tizi Uzzu. ‘’Yessers uḥeddad afḍis, yerfed-it mmi-s.’’
Mačči d yiwen wugur i d-tettmagaremt deg unnar ɣef wakka nettwali. Acu-ten iɛiyyiqen-a ?
Massa LAKROUT : ugur ameqqran, d lbiɛ n wayen nxeddem : ur nettaf ara win ara t-yaɣen. Dagi, limmer d lebɣi, ddewla ad teg ttawil i wanect-a. Ad aɣ-tɛiwen deg lbiɛ.
Ugur wis sin, d taḍuṭ. Ur d-nettaf ara taḍuṭ tazedgant dagi deg leqruba-agi. Nettawi-tt-id deg Ghardaia neɣ deg Tiaret. Daymi, tikwal, nxeddem kan akken nufa, swayen nufa u aya yessenqas deg wazal n uẓeṭta.
Tafaska-agi, axir mi tella deg Ath Hichem neɣ axir deg Tizi Uzzu ?
Massa LAKROUT : limmer d lebɣi, tafaska ad teqqim deg taddart-is. Dinna i tesɛa amezruy-is, dinna i d aɣbalu-ines. D tigemmi n Wat taddart.
Ɣef wakken i d-yenna uneɣlaf n yidles Mass Azeddine Mihoubi, tafaska-agi ad tuɣal taɣelnawt. Ad d-yili kra ara ibeddlen ?
Massa LAKROUT : dayen igerrzen mi ara tuɣal d tafaska taɣelnawt. Aql-aɣ, dɣa, ad d-nettheggi tiddukla taɣelnawt n yinaẓuren.
Yesteqqsa-tt Hocine. M