Nufa ayen din n yimdanen i d-yusan ula d nutni ad ttun i kra n teswiɛt zzhir d uɣamac n temdinin d tkeryas. Amekkan yecbaḥ mačči d kra. Tasusmi d ubeḥri azeddgan srusun-d talwit d usteɛfu ɣef ṣsurra n bnadem. Sya ɣer da, alamma tesliḍ i temqerqar, neggzent ɣer daxel n waman, neɣ cergent tasusmi s ṣsut n usqerqer-nsent. Imdanen, qqimen ɣer tama n temda, yal wa s wacu i d-yelha : wa itett, wayeḍ yettnecraḥ ; wa yeṭṭes, wayeḍ iceṭṭeḥ… Nemmlal akked kra n tdukliwin i d-iqesden amekkan-agi. Akka, dɣa, i d-newwi awal akked kra n yimḍebbren-nsent. Dalila (AJIE) : tirza-a, tekcem deg wahil-nneɣ. Nebɣa ad nẓer imekwan, syin ad nwali amek ara nḥareb fell-asen. Amekkan-a, dayen igerrzen, yuklal ad nessiḥbiber fell-as akken iwata. Ania : Agelmim Aberkan d amekkan igerrzen, aṭas ur numin ara dakken deg tmurt n leqbayel i yella mi t-walan deg Internet. Ihi, iswi-nneɣ d wa : ad d-nessekfel imekwan am wigi i wakken ad ten-walin wiyaḍ. Ad nwali d acu n ttawilat i ilaqen i useḥbiber ɣef yimeḍqan am wigi. Kosseila : ur nwiɣ ara ad d-afeɣ amekkan am wagi. Yecbeḥ mačči d izli. Acu kan ilaq ad nesseḥbiber fell-as. Imdanen ilaq ad ḥṣun dakken agama yeḥwaǧ ad t-nqader, ma nebɣa ad aɣ-iqader.
Hocine Moula