Anwa uṛ nessin aṛa Louiza tanaẓuṛt taqbaylit yesɛan taɣuct yesfan am aman? Tacennayt-agi yesɛan amezṛuy deg cna aqbayli, tekcem ɣeṛ umaḍal n cna deg useggas n 1978. D dda Slimane AZEM is-d ixedmen lkuṛaǧ imi yesla i taɣuct-is, tɛeǧeb-as aṭaṣ ! Seg tezlit ɣeṛ tayeḍ, seg tesfift ɣeṛ tayeḍ, Louiza texdem yakan isem, tewwid amkan-is geṛ inaẓuṛen imuqṛanen. Louiza iwumi yenna yiwen wass unaẓuṛ Idiṛ: « Mti t-cennuḍ as t-iniḍ d-iduṛaṛ n tmuṛt leqbayel i yecennun! ». Tanaẓuṛt-agi tecna ɣef yidles Amaziɣ, ɣef yizeṛfan n tmeṭṭut, ɣef yiɣublan n tudeṛt, ɣef tayṛi lakked timeɣṛiwin. Imesfliden ufan ayen bɣan deg tizlatin-ines acḥal ḥlawet yeṛna s ṣṣut-is ḥninen aṭaṣ. Akka, aṭaṣ i d-yennan belli Louiza d taɣuct geṛ tuɣac n tcennayin ifazen aṭaṣ deg cna aẓẓayṛi. Tizlatin-is ttwasnent aṭaṣ deg wannaṛ n cna aqbayli. Abṛid i d-tewwi ɣezzif. Ɣuṛ-s akka azal n 40 iseggasen deg waḥṛic n cna. Teskles azal n 25 tesfifin neɣ n-iḍebṣiyen. Nna Louiza tettaṛu isefṛa, txeddem aẓawan, tesseklas tizlatin-ines. Ttacennayt s wazal-is. Tikkelt-a, tessufeɣ-d aḍebṣi amaynut ass n 8 deg Maɣṛeṣ yezṛin. Textaṛ-d ass-nni n lɛid amaḍal n tmeṭṭut, imi d-azamul n-umennuɣ ɣef yizeṛfan-is. Louiza d yiwwet akkeni n tmeṭṭut tagṛawliwt, yekkaten ɣef yizeṛfan n tlawin s-umata. Ɣef ayagi i textaṛ ass-nni n 8 deg Maɣṛeṣ akken ad d-ssufeɣ aḍebṣi-ines wis 25. Wagi t-semmay-as : »Afus-ik deg ufus-inu ». D tiɣṛi i waṛgaz, azgen nniḍen, akken ad mmuqlen imal di sin yidsen, imi ddunit tebna fell-asen. D tiɣṛi daɣen i waṛgaz, i gma-s, i wemɣaṛ-is akken ad dduklen afus deg ufus akken ad idiṛen deg telwit, mebla caḥnat, mebla iniɣ geṛ tmeṭṭut d waṛgaz. Aḍebṣi-agi id d-tessufeɣ Nna Louiza llant degs azal n 10 tezlatin. Geṛ-asent nezmeṛ ad nebdeṛ: « Dayen uṛ ttamen-ɣ yiwen », « Aṛqiqes! », »Uṛiɣ-ak tabṛatt », »Usiɣ-d ɣuṛwen », »Ttɣiḍen-iyi yilmeẓyen », »Anef-t-iyi! ». Tizlitt-agi taneggaṛut, « Anef-t-iyi! », d yiwwet akkeni n tezlitt anda Louiza tegeṛ-d tiɣṛi i tmetti akken att-fek tilleli i telmeẓyin, iḥussen iman-nsent am akken ttuaṛzent s laɛwayed lakked d ttɛessast. Deg tezlitt-agi, Louiza am tnaẓuṛt yeṛfan, tecna: » anef-t-iyi uṛ ay ttɛassa-t aṛa. Anef-t-iyi kṛa uṛ texdim-ɣ aṛa. Anef-t-iyi ɛeẓṛayen uṛ t-ugad-ɣ aṛa. Anef-t-iyi ulac win yemmuten yuɣal-d. Akken aɣ-id yawi lexbaṛ. Aɣ-i-d-yini f-ayen yeẓṛa. Ma d elḥaq neɣ d elbaṭel ». Ayagi d tiɣṛi n tiɣuwwewt n tmeṭṭut yebɣan atteṛṛeẓ ackal i as d-yexdem weṛgaz seg zik. Louiza uṛ t-ttezzi aṛa iles-is sebɛa tikkal deg yimi-s akken ad d-ini ayen yellan ɣef wul-is. Yuɣ lḥal d nettat, am tinaẓuṛin nniḍen, i d-iles n tlawin yettuḥeqṛen deg yixxamen nsent, neɣ deg yixeddim nsent. Ma newwid awal ɣef tezlit nniḍen, tagi d « Aṛqiqes! ». D yiwwet n tezlitt yelhan aṭaṣ aṭaṣ, imi tessawal i cḍaḥ d lfeṛḥ. Akken medden ad ksen ɣef ulawen nsen yeččuṛen, yagi deg yiseggasen-agi n tezɣent, anda tamɛict tuɣal tuɛeṛ aṭaṣ ɣef yiẓẓayṛiyen. Ma wezzil wawal, ad d-nini kan belli aḍebṣi-agi aneggaṛu n Nna Louiza yelha dayen kan. T-geṛz-it mliḥ deg yal tama, ama d-aẓawan, d-isefṛa neɣ d taɣuct. Imesfliden uṛ nedmen aṛa ma slan i uḍebṣi-agi n Louiza, yeqqimen akka ttilemẓit.
Syohax.Y