Taddart n Izararzen id yezgan deg tɣiwant n Timizart deg dayra n Wagenun (lɛerc n At Jennad) tegger irebbi i terbaɛt yellan deffir umazrar (feuilleton) «yella deg awal» ara d iɛeddin deg tilibizyun n tmaziɣt (ENTV4) deg ussan-a id teddun.
Yuɣ lḥal aḥric amenzu n umezrar-agi iɛedda-d yekka ɣef agdil ( écran) deg aggur n Ɣuct yezrin (aggur n remḍan). «Leɣzel n umezrar «Yella deg awal», am akken i ɣ- id yenna umsufeɣ -ines Mass Reda Amrani, yewwi d ulman-is seg lemtul n teqbaylit. Lɣerḍ id as nebɣa : ad yeḥyu anziyen- agi id ǧǧen imawlan-nneɣ akken ad afen tudert nniḍen deg timeti tartart (anda, ahat amdan, tamara tikwal, i tettu ansi id yekka d sani i teddu, iɛerq-as ula d anwi i t-yillan). Ɣef aya tazwart n umezrar d tadyant (yeḍṛan neɣ izemren a teḍṛu, d teqburt neɣ tamirant) ara d yawin sebba n tmenna n wanzi. Di yal taxelalt yettili afser n wanzi id yeɣlin deg awal, acu i d-anamek-is, amek yettwafeṣel, amek i-ixaḍ, amek yesenta iẓuran deg akal n timeti ansi id yefruri, d anwa asekkud wuɣur yettmuqul.».
Wid iwalan aḥric amenzu id tesken tilbizyun n tmaẓiɣ deg unebdu-agi yezrin, ur ḥyin ara deg acekker deg umazrar-agi. Ayen yeṭṭfen lwlha ɣer-s, d tikti s wacu id yegla imi yessemlal amdan akked yiman-is. s kra n win nesteqsa ɣef umzerar-agi yemmeslay-aɣ-id ɣef telqay n teqbaylit yellan deg usinaryu –ines (tutlayt) yura umezdyaz Mass A. S. Noredine, akked ṛẓana n izaffanen (comédiens) yuraren degs am Mass Hocine Ait Gueni, Nacer Mouhouche, Ahmed Slimani, Toufik kaouedj, Ouiza Nahar, Djamila Bouanem, Safia Ounir.
«Azal n 30 n tixellal ara yilin deg aḥric-agi wis sin n umezrar iɣ-id yenna Mass Noredine: « Tira n isinaryuten nella-asen di lmendad d sin yid-nneɣ nekk akked Ḥamid. Tuget n teqsiḍin id newwi d t-id i kecmen ansayen n tmurt n leqbayel, nesquccḍ-d kra deg ayen i-ɣ-id ḥkan imawlan-nneɣ deg temẓi, maca llan-t tiyaḍ d asnulfu imi yal anzi ilaq as-id yaf wemdan tadyant ara t –id yawwin deg awal.»
Maca a filmi n wayen-nni n tixelalt, yesutur ttawilat meqran, tadrimt s waṭas i wakken asaru ad yawi udem is yebɣa bab-is. Ɣef ugur agi i temderkal terbaɛt agi yellan deffir umzrar-agi .: « Nxeddem akken nufa s wacu nufa. Akken ad yesrifeg ufrux ilaq-as ad irebbi afriwen, afriwen irefden sinima d adrim. Xuḍi di tmurt-nneɣ a sekcem n wedrim deg leqdic adelsan ulac-it di lɛeqliya n imsihranen (detenteurs de capitaux)n tmurt-nneɣ. Ɣef aya mi nettaru isinaryuten, neseḥras akken taqṣit ur d tesutur ara allalen imeqranen, acku qṛib s wulac i nettqazam asufeɣ n umezrar agi. Wamma lemmer id ak terbiḥ a wul, nezmer ad nsali isura akked imezraren ara yili nned ɣer nned d wayen xedmet leǧnas nniḍen deg aḥric-agi, acku llan taktiwin, llan wid yettraun isinaryuten ifazen, llan imsufɣen yesnen acu id anemek n sinima. Meɛna ama akken yella deg awal: “ulac ur ixeddem ara tafenṭazit», id yerna deg awal Mass Hocine Ait Gueni yiwen seg izaffanen (comediens) yettikkin deg umezrar-agi.
Ait Slimane Hamid