Amuḍin yesteqniɛ ma yella tsubb-as tawla xas aṭan werǧin i t-yeffiɣ. Akka i d-teḍra d kra n teẓrigin akked yemyura ɣer-nneɣ d agi di tmurt. Ṛewwun s tunṭict amzun akken yella kra gran gar tuɣmas akken a t-feẓẓen. Xuḍi teḍṛa-tt yid-sen am win umi zaden ggaren-as awren. Lferḥ-nsen mi ara walin sin neɣ tlata n yidlisen i d-sufɣen i useggas sɛan rreḥba di ssuq –agi n wedlis (SILA) i d- yettilin yal aseggas di lẓẓayer tamanaɣt. D ahdum ! Di tmura irebḥen tiẓrigin sufuɣent-d idlisen i lmend n tsekla i tazwara, mačči akken ad ttikkint s yidlisen-nni deg welbaɛd n leswaq agraɣlanen i d- yettilin sya d sya di tmura n ddunit. Tasertit n teẓrigin-agi tebna ɣef ṣṣwab: aṣsiwed n wedlis i yimeɣṛiyen anda ma llan di yal lawan . Yal yiwet anwa aḥric di tira i tɛebba. Llant teẓrigin yesɛan d cɣel tasekla s wudmawen-is ( ungalen, tullizin, tamedyazt, amezgun) am akken llant tiyaḍ amahil-nsent yeqqen ɣer tira ɣef umezruy, ɣef tussna, ɣef tsertit, ɣef tasnametti. Nnig waya deg yiwet n teẓrigt ad naf aṭas n taneklisin( collections). Amedya tiẓrigin n Harmathan tesɛa taneklist n wungalen , tin n tullizin, tin n tmedyazt … S wakka yal aḥric di tira yesɛa tansa-ines i wakken ad yaf abrid ɣer tawafɣa yerna ad yaweḍ ɣer imeɣṛiyen teɣzi n useggas s lmend n tinedlisin( libraries).
Maca ɣer-nneɣ nekni kulci yemgared. Tuget n teẓrigin, ma yella izad, sufuɣent-d xemsa ɣer setta n tektabin deg useggas yerna merra ttraǧunt lawan deg i d-yettili ssuq-agi n wedlis( SIlA) akken ad sufɣen tiktabin-agi acku yis-sent i d- ttafent tagnit akken ad sbucɛent iman-nsent di rreḥba-agi. Mi yekfa ssuq ad tezzi takka ɣef ayen i d-sufɣen..war ma yesla yis-s yiwen neɣ yuɣ-itent wayeḍ. Ahdum nniḍen ula d imyura ddan deg urar-agi( anda aqlileḥ iɛuned tikli) imi lferḥ-nsen mi ara d-ttwanecden ɣer din( Ɣer SILA) amzun wissen acu n warraz agreɣlan n tsekla i d-wwin. Ziɣ daymi i qqaren deg awal: » laẓ ur i seččaya ara baba »! Ajeǧǧîḍ-agi( i taggara-agi) iḥuza ula d wid yettarun s teqbaylit imi nwan dayen ḥerren-d amḍiq acku ggan-asen abziz n nuba di rreḥba-agi n wedlis(SILA) xas ulamma ziɣ llan kan d ajɣed n zyada neɣ iqfafen n taggara . Ziɣ llan wid iḥamlen aɣebbaṛ s allen .
Ait Slimane Hamid