D ayen i yezmer ad iwali ula d agrud ameẓyan. Segmi yeḥbes Ugraw n Taddart n Krun deg Ayt Tɛisiwt, tuɣal temnaḍt-a teqqur, yeqqur kullec deg-s. Deg uqerruy-is yella deg-s mass Gemmac Idris, d aselmad deg Ayt Smaɛel, lwaḥi d kra n yilemẓiyen i yeddan akken yid-s kra n tallit. Maca, tidukkla-ya ur tdum aṭas n wakud; tɛedda kan ad d-terr ttmaggan deg wannar kra n yisenfaren igejdanen deg taddart, wid ɣef llan ccettkayen kra n yimezdaɣ, mi d-yekka wayen ara yesḥebsen armuden-is (activités) sɣur yimezdaɣ-nni gedged i yugin ad ddakklen yid-s. Ɣur uselway aqbur n tdukkli-ya n taddart, segmi yebberka ugraw aqeddic-is, uɣalent tlufa teddunt i twaɣit. «Lḥala n taddart segmi yeḥbes ugraw iban; aql-itt teqqur seg yal tama. Rnu ad ak-d-iniɣ belli azgen seg taddart yeɛjeb-asen lḥal». Akka i yesḥassef Gemmac Idris ɣef wid yettwalin deg umihi inmetti (danger social) nutni acemma ur bɣan ad t-id-xedmen. Send ad aɣ-d-yernu iwenniten-a s kra n usirem: «atan ma yebɣa Rebbi ad d-nerr ussan-a agraw s annar. Abeddel n lwali n Bgayet ed uselway n tdayra n Yiderginen, d tagnit i nekni akken ad nessuter izerfan-nneɣ s usaḍuf (lqanun)». Gar wayen seg nnuɣnan kra n yimezdaɣ n taddart, d asenfar n internet i iruḥen almi mazal mimuc ad d-yemmag, syinna bran kra i ṭṭbel deg waman, yeqqim akken d asirem. Maca yezmer ihi ad yili ubeddel sey-a ɣer sdat iqerben imi tella terbaɛt tenwa d tidet i waya. «Tarbaɛt-a tɛewwel d tidet i useggen, imi dɣa kra n wid yellan deg-s d ageɛmir. Ussan-a ad nexdem ikwaɣḍen i ilaqen seg tedbelt (administration)». I aɣ-d-yerna taggara win i aɣ-d-yettmeslayen.
Mhenni Xalifi