Axxam n yedles n Mulud At-Mεemmar n temdint n Tizi-Wezzu, yesduri-d ddurt-agi yezrin tusnawt γef Kateb Yasin s teγzi n 02 wussan 28 d 29 tuber 2015, s usentel « Kateb Yacine, d amaru bu tira yegten d udmawen ». Dγa deg yisaragen s yiskasiyen ixedmen yisdawanen, wwin-d awal s telqay γef umecwar n tsekla n ungal, akken isqardcen awal γef tmezgunt n Kateb Yasin. akken id-tella temzikent γef tudert n umyaru akked umeskar n Nedjma (Itri), asenεet n tecquft n umezgun, syen segran s tγuri n kra n yeḍrisen n Kateb. Timlilit-agi tesdduritt-id tzeqqa tameẓyant n leqdicat n wexxam n yedles n Mulud At-Mεemmar n Tizi-Wezzu anda iḥedren deqs n yinelmaden n tsedawit n Tizi-Wezzu i ilemden tutlayt n Tefransist. Ma yella d imsaragen yellan deg ahil n temlilit tusnawt, Dr Fatima Malika Boukhelou , d taselmadt deg tutlayt akked tɣerma tafransist di tsedawit n Tizi Wezzu, id-yeγran aḍris n Yasine , « Seg yimbiddalen n Uɣyul n Afulay, ɣer uɣebbar n lefhama n Kateb Yacine neɣ tasmedna taɣerfant i umi d-ulsen anulfu ». Syen mass Ali Chebili , d aselmad deg ugezdu n tefransist di tsedawit n Tizi-Wezzu, yeγra-d aḍris « Nedjma, tira yegten d tuɣac n ugzam neɣ aɣewweɣ n cbaḥa ». Ma yella d mass Mohamed Lakhdar Maouga, aselmad deg tsedawit n Lezzayer yemmeslay-d γef « Timmuzɣa ɣur Kateb Yacine ». Tighilt Mohamed Amokrane, d amusnaw, d aselmad n tutlayt n tefransist di Tizi-Wezzu, d anaẓur imi d argaz n umezgun yemeslay-d γef azal n ungal Nedjma s usentel « Azamul n Nedjma », ma yella d « Tawinnest n ttaṛ : aseɣret n tegrawla) s ɣur Aini Bettouche, d taselmadt taqburt n tesdawit n tsekla akked tutlayin di Tizi Wezzu. Axxam n umezgun amnaḍan n Tizi-Wezzu i yewwin isem n umyaru kateb Yasin, yesduri-d tagara n temlilit s tecquft n umezgun id-ksen deg yeḍrisen n Kateb Yasin, id-uraren yinelmaden n tsedawit n Tizi-Wezzu. Kateb yasin ilul ass n 6 ɣuct aseggas 1929 di temdint n Qsenṭina, deg usamer n tmurt n Lezzayer. Mbeɛd mi yekcem ɣer uɣerbaz n uselmed n Leqqran aseggas n 1936, yuɣal yekcem ɣer wulmud deg uɣerbaz n tesnawit afransawi. Di 8 maggu 1945, yesεa 15 yiseggasen kan di leεmer-is, yekki di tmesbanit-nni i d-yellan deg temdint n Sṭif mgal lbaṭel imahrasen n tmurt n Fransa, yugi tudert n ddel. Dɣa yettwaḥbes 4 wagguren. Yemma-s tɣil dayen yettwanɣa, dɣa ifukk fell-as usirem, tesleb. Tkemmel ussan-is di sbiṭar n Blida. Aseggas n 1946, yessufeɣ-d adlis-ines amezwaru, d amud n isefra. Di 1948, yuɣal d aneɣmas deg uɣmis Alger Républicain. Aseggas n 1951, yunag ɣer tmurt n Fransa. Di 1955, yessufeɣ-d yiwen n udlis Le cadavre encerclé. Aseggas mbeεd, di 1956, yessufeɣ-d adlis-nni yettwassnen ugar wiyaḍ, win i as-yernan azal, wagi d Nedjma di tizrigin n Seuil. Aseggas 1959, yessufeɣ-d Le cercle des représailles. Gar yiseggasen n 1966 d 1970, yerna yessufeɣ-d sin n yedlisen-nniḍen, wigi Le polygone étoilé akked L’homme aux sandales de caoutchouc. Asmi i d-yuɣal Yasin Kateb yettidir di Lzzayer, yeṭṭaxer i tira n yedlisen, yuɣal yettaru amezgun s tutlayt n taεrabt n Lezzayer, dɣa yesbedd yiwet n tdukla n umezgun d netta i yellan ɣef uqerruy-is. Gar tceqqufin-ines yettwassnen ; Rrfed tabalizt-ik a Muḥ (1971), Tiɣri n tlawin aseggas (1972), Ṭrad n 2000 yiseggasen (1974), Palestine yettwaxedεen (1975). Kateb Yasin yecrew-d aṭas n warrazen s tegzi-s. Aseggas n 1963, yewwi arraz n Jean Amrouche, i d-tsuddes tamdint n Florence n tmurt n Ṭelyan. Aseggas n 1975, yewwi arraz n Lotus n yimyura. Aseggas n 1980, yewwi arraz amenzu n yizem i umezgun, Académie Simba et Corriere Africano. Aseggas n 1987, yewwi arraz ameqqran aɣelnaw n tsekla i as-tefka taɣlift n yedles n tmurt n Fransa. Ayen i d-yeğğa Kateb Yasin d aggeruj ur nettfakka, tisutwin i d-iteddun ad t-id-afen. Yasin yemmut deg waggur n tuber aseggas 1989 di temdint n Grenoble, tamurt n Fransa. Yuklal ayen yugaren tajmilt acku d netta id ajgu n tsekla Tazzayrit.
Islam Bessaci