Seg ṭuber-aya n useggas yezrin i d-yessawel Usqamu Unnig n Timmuzɣa lwaḥi d Tdukkla « Iqra » n Lezzayer Tamaneɣt, i wid yebɣan ad jerrden iman-nsen bac ad lemden tutlayt-nsen tanaslit; tutlayt tamaziɣt. Ilmend n waya ihi, kra llan ttraǧun tagnit-a akken ad tt-farsen war isteqsiyen, imi ɣur-sen tutlayt-nsen tezwar. ɣef waya i d-iban waṭas n lebɣi ula ɣur wid ibeɛden seg uxxam n yidles n Bgayet neɣ d wid iɛeddan akkin i uzgen n tasut deg umdur. Maca tella yiwet n taluft i d-ibanen d aɛewwiq n yimdanen-a i iɛewwlen ad tthennin i tewreɣrit(analphabétisme) deg tutlayt tayemmat: wa d lexsas n wallalen akked usuddes iwatan. «Iḥun Rebbi tura nuɣal-d d tawacult nekk akked terbaɛt n 35 n yiterrasen i ṭṭfeɣ. Wamma taluft ur telli twenneɛ xilla ɣas nettqabal-itt akken i d-tusa». I aɣ-d-yenna mass Zidan Yasin, yiwen seg wid yesselmaden tamaziɣt i yimeqqranen, send ad d-yernu: «Tikwal nxeddem ugar n tzemmar-nneɣ, ama s tiɣin n tɣawsiwin neɣ s uḥebber sey-a ed sey-a ɣef wamek ara nessefreḥ inelmaden-nneɣ imeqqranen. Maca, nesḥassef kan amek almi werɛad d-wwḍen yidlisen swayes ara nesɣer. Atan aql-aɣ deg furar mazal ur ten-neṭṭif. D ayen ilaqen akken ad tefsus teɛkemt ɣef wid ilemmden ladɣa». Iban-d d awal n win yebɣan ad lḥun yiqeddicen akken ilaq. Imi aselmed n tmaziɣt drus-as timmeɣnest akken ad d-tawi akk ayen yetturaǧun, wanag ilaq-as ugar n uwelleh sɣur uwanek deg wakud ideg zun tura d tutlayt d tunsibt. Ihi amek deg Bgayet weḥd-s ḥaca deg yiwen n umḍiq i tt-sselmaden ar tura?
Mhenni Xalifi