Menbeɛd ungal « Bururu » id yewwin ɣef taluft n rebrab iḥuzan tamurt deg iseggasen 90 , Tahar Ould Amar amaru akked uneɣmas yettarun s teqbaylit akked trumit , yessufeɣ-d deg ussan-a yezrin ɣer tiẓrigin « Achab » adlis nniḍen ddaw uzwel « tafunast i tezgen Lpetrole » yellan d taḥawact n tneḍuryin yura gar useggas 2010/2011 deg uɣmis n imaziɣen. Ɣef wamek id ilul wedlis-agi, d wamek yettwali Tahar tasekla taqbaylit tamirant akked tira tineɣmest s teqbaylit, id yella gar-nneɣ wawal deg tadiwennit agi yellan d ddemma n twafɣa n wedlis-agi ines amaynut
Yeffɣed ɣer tizrigin Achab udlis-inek «tafunast i tteẓgen pètrole” , awal ɣef udlis-agi? Ayen azwel-agi ?
Adlis-a d taḥawact n «tneḍruyin» (chroniques) d-yeffɣen gar 2010 – 2011, dɣa deg weɣmis-a. Akken teẓriḍ, «taneḍrut» d annay, tamuɣli n uneɣmas ɣer tedyanin d-yufraren deg tallit. D acu , deg iḍrisen-a, anni n tmeti yella-d s wecmumeḥ d unecrah. Asmi d-fɣent deg DDK, «tineḍruyin-a» semmaɣ-asent Ulac mmaḥ, ulac». Asmi kreɣ ad ten-d-reɣ s adlis, walaɣ belli azwel «tafunast i tteẓgen pètrole” ad yesleḥ, imi , si tama yella yiwen weḍris isem-is akka, si tama nniḍen tawaɣit n tmurt tcud ɣer tfunast-a i yeksan melba ameksa.
Acu n isental yak yellan deg adlis-agi ?
Ddeqs i yellan. Ayen akk i ceɣben timeti di tallit-nni (2010-2010). D Abibiḍ i d amsiwel – awudem (personnage –narrateur). Yettmeslay-d ɣef ayen d-yezzin yes-s . yeḥḍer i 20 di Yebrir, i tmeɣra n tmeṭṭut, i leɛyud, yefka-d rray-s ɣef sonatrach, ɣef lakul … lḥasun mačči d yiwet. Ayen akk i iwala yerra-t-id s uɛekki d unecraḥ
Wissen ma yella yella di lbal n Tahar ad ɛiwed asezrireg u ungal-ines Bururu?
Tagi d taluft n tezrigin. Tezriḍ belli tizrigin d tikubaniyin n tdamsa, lmaɛna-s, ad gnet irebbi ḥala i wayen walan deg-s nfeɛ. Lḥasun, nek, si tama-w ulac aɣbel. D acu, aqli caxex d yiwen u ngal ara yeddun di later n Bururu. Ɣuri tura ugar n sin n yiseggasen segmi I d as-begseɣ. Wissen milmi ara ifak.
Amek yettwali ¨Tahar tasekla teqbaylit tamirant ?
Tettedu dac dac. Maɛna tetteddu. Ad tejuǧǧeg ugar lukan dɣa wid akk yettarun suffuɣen-d u wid yeqqaren ttaɣen-d. tat cud ɣer ta. Rnu daɣen ilaq ayen d-itefɣen ad yemɛen, ad yesɛu lbenna. Acku akken nebɣu nberreḥs wayen nettaru ma ulac deg-s ayen imeɛnen ad t-ɣunzun cwṭ n yimeɣriyen yellan.
Awal ɣef liḥala n wedlis amaziɣ?
Adlis amazigh ? Tidet kan ur t-ssineɣ ara. Tamaziɣt i sneɣ d taqbaylit. Tutlayin nniḍen n tmaziɣt (ma d ayagi i d-qesdeḍ) ur tent-lemdeɣ ara. Rnu ɣas ma lemdeɣ-tent, ur ttafeɣ ara idlisen ara ɣreɣ, slid ahat yiwen umawal neɣ sin.
Amek yettwali Tahar tineɣmest s teqbaylit? Anda id tesewwed? Amek id imal-ines?
Taɣamsa s teqbaylit milmi kan i d-lul, rnu s wulac. Taluft-a tcud aṭas ar tedrimt d rray i iwenɛen i usebded n tɣamsa. Mi d-nejmeɛ ayen akk I ilaqen n ttawil d tedrimt, ad nwali anwa akka ara yeɣren d wacu I yettraju ad t-yaf deg uɣmis. Axater win ara d-yaɣen aɣmis (akekn tebɣu tili tutlay), yettnadi iman-is d wayen t-inefɛen daxel. Ayen nettaru tura deg cwiṭ n yiɣmisen yellan texneq-it tsekla, tijmilin, cwiṭ n usali ssemḍen d waṭas wawal i icuden ɣer usentel identitaire. Tifaɣ, deg wa, l’APS lukan I san vwiṭ n rruḥ isallen-is u lukan daɣen i tesɛa tilelli. Asmi ahat taqbaylit ad d-feɣ seg wul d wawal u ad tt-id-saḥ s tidet wamkan-is di yal aḥric n temetti, ass-nni ad d-yili uɣmis s uzal-is imi d netta I d lemri n tmeti.
Deg acu temgared tira taseklant akked tira taneɣmest?
Tira di tɣamsa teččur d leqyud. Amezwaru deg-sen d tigejdit (la ligne éditoriale). Mara tettaruḍ deg weɣmis ur tettḥessiseḍ ara i rray-ik: d-tiniḍ ayen twalaḍ, d wayen tesliḍ. Rnu ad tarud akken ara k-tefhem lɛamma, ama win yeɣran , ama win i ixussen.
Di teskla ulac akk leqyud-agi. Tira taseklant tettak aṭas azal, i wamek ara d-tinniḍ. Di tsekla d talɣa(la forme) i yisibninen aḍris. Di tɣamsa d asali (le fond) I –yissibninen.
Awal aneggeru n tahar I yimeɣriyen n uɣmis n imaziɣen
Ɣas ulamma nḥar ad naweḍ, ad nessiweḍ tutlayt nneɣ anda wweḍent tutlayin nniḍen, ilaq ad as-nelḥu s ttawil, ad nezwir tigzi (l’intelligence). Ilaq daɣ ur nḥebbes ara tira. Ad d-snulfu di yal aphric. D asunlufu kan i yessawaḍen, ad issiweḍ tutlayt anda ur tezmir ad t-tesiweḍ tmendawt.
Ait Slimane Hamid