Ɣas addad n terwuri (chômage) deg tmurt n Lezzayer yewweḍ deg yiwet n tallit ɣer yiwet n tseddart ur tessefraḥ, almi aṭas n yilemẓiziyen ay d-yettafen iman-nsen rrif n ubrid mara d-ffɣen s ugerdas (diplôme) seg tesdawit, maca seg tama-nni iban-d yiwen n ubrid, ɣas yewɛer, i yettawin ɣer uxeddim deg waṭas n taɣulin (domaines): wa d win n sseḥra. Ma newwi-d amedya ɣef uḥric n usegmi (tterbya), ahat d igiman n yilemẓiyen i iruḥen seg ugafa ɣer unẓul anda ufan ttawil i yiman-nsen, leḥqen amkan n uxeddim, uɣalen tthennan seg tama-nni n uɣrum. Seld mi rwan aḥebber deg temnaḍin ed waɣiren anda zedɣen, walan dakken ala aneẓruf i asen-d-yeggran d tifrat ma bɣan ur yettrag d taxessart wayen ɣef ɛetben deg teɣzi n umecwar-nsen n ulemmud. Dɣa, acḥal d ilemẓiyen i yusan seg Bgayet iseggasen-a ineggura, ṭṭfen s usirem abrid aɣezfan n Sseḥra. Ass-a, din i sselmaden, din i zedɣen d iɣriben ɣef wat-nsen. Ulama zgan guggen ɣef wid i ḥemmlen ḥemmlen-ten , skud ula d tifaskiwin neɣ d leɛyudat sɛeddayen-ten tikwal weḥd-sen seg wakken teɣlay ssuma n rrwaḥ-tuɣalin ɣer Tmurt n yidurar, wanag terra-ten tmara ad sqenɛen kan s tegnit yellan, i ten-iḥettmen ad muqlen ɣer yimal-nsen. Seg tesga nniḍen, yenna-yaɣ-d yiwen n uselmad i iruḥen seg Bgayet belli, akken ad ssettun iman-nsen simmal ttnaman, kra n wid i yelfan deg uneẓruf, iger ad yeɣlet akken iwulen ccbaḥa n Uheggar ed tsusmi-s. Rnu-yas, war tatut, almad kra kra n tutlayt-nni tacebḥant i d-turew tmaziɣt, mu ssawalen: tamaheɣt.
Mhenni Xalifi