T aɣiwant n Ait Aissa Mimoun i d-yezgan deg ugafa n lwilaya n Tizi Wezzu, i ibaԑden fell-as azal n 15 km, taɣiwant ideg llant 23 n tudrin, mazal tettidir iseggasen-agi ineggura lexsas ameqqran, deg yeḥricen d yisenfaren yemgarden n tudert. Gar-asen ttawil n Internet, lgaz n temdint, yir liḥala n yiberdan…atg
Tuddar n taɣiwant-agi nḥafent aṭas imi ar ass-a n wussan mazal ugur n Internet ur yefri ara. Ma yebɣa yiwen ad yazen neɣ ad d-yawi kra seg Internet, ilaq fell-as ad yerzu alamma d tamdint n Tizi Uzzu. Ilaq ad yelḥu 15 km, neɣ yezmer lḥal ad isruḥ yiwen wass ɣef liğal n ssaεa. Maca lukan i d-tewwiḍ s ixxamen, tili mačči akka. Ugur wis sin i d-irennun lḥif i yimezdaɣ n tɣiwant-a, d win lgaz n temdint; imi mazal ar ass-a n wussan aɣbel n usenfar-a ur yefri ara. Aṭas n tudrin yeddren aɣbel-agi, acku di ttnaṣfa n useggas 2015 I yebda, mazal ar ass-a urԑad yekcim ixxamen , anida Leqrar-is ? . Imezdaɣ n tuddar-agi ṛwan lḥif, ladɣa deg tsemhuyt n tegrest, neɣ deg wussan n ccetwa, imi acḥal n tikkal i leḥun d likumiṭer i wakken ad d-awin taqerԑat n lgaz, ama d aggefur, neɣ d adfel. Tikwal ttuɣalen-d ifasen d ilmawen. D ayen iten-yeğğan ad d-gren tiɣri yerna ad sutren deg wid teԑna temsalt gar-asen imeḍbbren n tɣiwant Ait Aissa Mimun, d Tanmehla n Imuhal Izuyaz (Direction des Travaux public). Aɣbel wis kraḍ, d win iberdan. Aṭas i yellan, deg tɣiwant-agi, deg yir liḥala, yecban abrid n Laԑzib n wugeni n Σmer, arnu ɣur-s abrid n taddart Iɣil n Wuccen, win n Uqawej, win n Tizi…atg Mebla ma nettu ugur wis ukuz, wagi yeεna ttawilat n usiweḍ (moyens de transport), Ladɣa wid yettawin ɣer yiɣerbazen. Llant tuddar yesԑan ,llant tiyaḍ ulac. Maca tid-k yesԑan lukan kan ay axir ur sԑan-t ara acku aṭas n ttawilat-a ad-ten-tafeḍ ԑyan, neɣ ur teddun ara. Aḥric n tedwest d sseḥa (la santé), yenxes, diɣ, ugar n yiḥricen-nniḍen, imi axxam n tujjya n Tala Ilillan ur yesԑi ara aṭas n ttawilat n udawi, yerna ur yesԑi ara takerrust n tujjya (ambulance) ara yettawin imuḍan.
Adaoun Abdelghani