Iternet neɣ aẓeṭṭa n tissist akken i d-as-qqaren kra, d yiwen wallal atiknuluji atrar. Tettuneḥsab d ttawil amaynut n teywelt i yetteqqnen talsa n umaḍal. Tettuneḥsab, daɣen, d amḍiq ussnan anda ttemllilin yimusnawen, yimedyazen d yimyura…atg. D tin i d-ittawin isallen ɣef yal taɣult, ama d tadamsa, tasekla neɣ ɣef yal tamurt deg umaḍal. S usexdem n ttawil-a ajdid, yezmer yal amdan ad iwali ayen yellan daxel-is. Yezmer ad d-yagem seg-s ayen yebɣa, yerna, ma ira, yezmer ad as-yernu kra. Yal amdan yezmer ad iqelleb deg-s, ad yexdem tazrawt. Yezmer ad iɣer s yal tutlayt di temkerḍitin-is d yimawalen-is. Llant ula d timsirin d iluɣma d yidlisen n yal aska. Yal asentel deg-s ɣur-s tansa; amedya ma yebɣa yiwen ad inadi ɣef tsekla tamaziɣt, ilaq fell-as ad yaru deg umḍiq-nni n unadi: www.imyura.net neɣ www.tamazight-tura.com. Ma yebɣa daɣen ad iḥewwes ɣef tinsiwin yesεan assaɣ d yidles amaziɣ sumata, issefk fell-as ad inadi
deg: http/www.tamurth.net, neɣ www.amazigh world.org neɣ www.inalco.fr.
Tuɣal ass-a Internet d tifrat i waṭas n wuguren, yecban anadi ɣef yidles d tɣerma, ama d tiqburin neɣ d tid n tura. Tessaweḍ terra amaḍal amzun d taddart tameẓyant, imi yezmer ad yili dagi deg tmurt n Lezzayer, ad yettmeslay d yiwen niḍen yellan di Marikan, yerna ad ttemwalin di sin srid deg Internet. Zik, I wakken ad tazneḍ tabrat sya seg Lezzayer ɣer tmurt n Fransa, ma ulac maḍi ad teqqim 20 n wussan neɣ aggur, maca ass-a s ttawil n Internet ad tt-tceggεeḍ imir, ad taweḍ imir. Ihi, ibaɣuren n Internet mačči yiwen, akken ad ten-id-nebder, maca akken i telha i tfuḥ, alaḥsab n wamek itt-isexdem umdan.
ADAOUN Abdelghani