Ar almi d ljemɛa iɛeddan mettwal tasebḥit, ttwajerrden s usḥissef tẓa (9) n lmeyytin deg teftisin n waɣir n Bgayet, gar 34 ideg yettwasemmeḥ uɛumu akked tid ideg yettwagdel.
Ma nebder-d kra n lḥalat seg wid iɣerqen, amenzu yeɣreq deg teftist n Bulimaṭ iweɛren, taɣiwant n Bgayet, ass n 26 deg yunyu. D mmi-s n tmurt n Zimbabwi, i yellan yesɛa 23 n yiseggasen deg tmeddurt-is.
Deg yiwen n wass yettwajerred wayeḍ i ččan waman, tameddit deg teftist yettwagedlen n Tizuyar, deg At Ksila. Almi i t-ufan azekka-nni mettwal 11:00 n uzal.
Daɣen, ass n 15 deg yulyu, teɣreq truḥ yiwet n tmeṭṭut deg teftist n yiẓra n At Mendil, mbeɛd mi yeslek yiwen n yilemẓi nniḍen seg Tizi.
Ass n 16 deg yulyu, d taɣtast tis tẓa (9) i d-yettwajebden deg waddad ixesren – ad yili d ilemẓi n ɛecrin, seg teftist n Wad emma Djemma, deg tɣiwant n Uweqqas.
Ad d-nesmekti dakken, ɣef leḥsab n Uḥuddu Aɣerman (Protection Civile) n waɣir-a i d-nebder, sebbat n twuɣa-ya n yilel qqnent seg uwellih amenzu i ustehzi n yiɛewwamen ɣef usaḍuf n uɛumu d teftist. Yettusemma, kra n win i iruḥen d asfel n lemwaǧi ad yili aha iɛum deg waddad azeggaɣ, am ddurt yezrin mi yenhewwal lebḥer, neɣ iɛum anida ulac taɛessast, neɣ yettbeɛɛid war aḥezzeb ɣer yimeḍqan iɣedren…atg.
Neqqar-d aya s waṭas n usḥissef d tsewham, imi ɣas ma seg umenzu n yunyu yezrin iga-d Uḥuddu Aɣerman ayendin d allalen i usellek d tɛessast n teftisin ilmend n tsemhuyt n umerreḥ, maca ḍerrunt-d twuɣa, yerna yettzid yettahda umḍan n wid iɣerrqen!
Mhenni Khalifi