D iseggasen segmi iɣab wudem aḥeqqani n Terbaɛt n Yilmeẓyen n Leqbayel. D akud ɣezzif i yezrin ɣef wid i tt-iḥemmlen i tt-yeṭṭafaren, wid i yessaramen ad tt-ttwalin deg unnar n rrbeḥ. Acḥal ncedha lbenna n telɣuɣa d teqbucin. Aṭas i nebɣa i nettraǧu s ccuq ad numer s wayen tella tettawi. Nennum igemmaḍ igerrzen, nwulef aɛeyyeḍ n lferḥ s yiswiyen, maca tura ulac ad d-qqlen wussan-nni. Nezga nettemseqsay acimi tbeddel terbaɛt-nneɣ? I wacu aswir n wurar-is iwexxer ɣer deffir? Ayɣer ur tettili ara s ljehd n wuzzal d rrsas am zik? Ayen ur tettaẓ ara ɣer sdat?… D isteqsiyen i yesɛan tiririyin i aɣ-d-yettakken tidet qerriḥen. Tarbaɛt n uwraɣ d uzegzaw, tin i yeɛceq yal azwaw, i yeǧǧan iles n win i tt-ikerhen yekkaw, ur teqqim tetturar ɣef nnif d lasel. Kra yeffeɣ-itt iḍurr-itt, kra nniḍen yekcem-itt yewwet-itt. Nekni imi d tarwa-s i nella, yak yis-s i nzux deg teswiɛin-nni, d nettat i aɣ-d-yefkan amur nerna-t d ccan, ur aɣ-d-isaḥ leḥya d uxzay. Ihi, win i d-yeqqaren dakken yettḥibi JSK, tayri-s tleḥḥu deg yidammen-is, tezdeɣ ul-is, ur ilaq ad tt-yeǧǧ deg teswiɛin n ddiq. Ur d lɛali ma ibeɛɛed ɣef terbaɛt n lasel-is, ad tt-iɣunza ɣef wayen i d-yekkan sɣur wid i yesɛan iswi yexḍa assaɛli n yisem-is. Amek ara nettu JSK iɣef cnan yinaẓuren-nneɣ?! Amek ara nebru i nnif ad nessefreḥ wid-nni i tt-kerhen?! Iban dakken leḥmala n tidet tettdum i lebda, ur tt-yessenqas, ur tt-yettbeddil kra. Daymi yessefk ɣef leqbayel anda ma llan, ad fken tallelt i terbaɛt-nsen s usebɣes akken ad d-tufrar am yiḍelli. Ad neqqim neṭṭafar-itt ɣef yisem-is, fiḥel ad neg leḥsabat-nniḍen i d-igellun s wayen ur aɣ-yehwi. Amek i as-yenna unaẓur: Yid-m ass-a d uzekka, nekni dima akka, d idurar i aɣ-d-yettawin. Trebḥeḍ nettekka, ma txesreḍ d JSK, Acḥal i yesserbaḥ yisem-im.
Kaisa Khalifi