Yenna-d umalal n udumaru n uwanak amarikani i tugdut d yizerfan n wemdan, Tom Malinowski, ass n lexmis deg Lezzayer Tamaneɣt, dakken taɣemsa «tejhed» yernu d «tilellit» deg Lezzayer. Iwekked-d umasay-a (mas’ul) amarikani aya i tɣemsa deffir udiwenni ay iga d uneɣlaf n teɣwalt (ittiṣal), Hamid Grine. Yenna-d daɣ dakken yessefk ad tettwassebɣes tɣemsa «ijehden» d «tlellit» akken ad ilin yiwanaken (duwal) «jehden ugar» am wakken ara «hennint» tmettiyin. Ma d Mass Grine, yessukk-d tiṭ d Mass Malinowski ɣef ttejṛibat n Yiwanaken Yeddukklen d Lezzayer deg tɣemsa, am wakken ay d-yenna dakken ttejṛiba tadzayrit temgerrad ɣef tin n Yiwanaken Yeddukklen, ladɣa imi ttejṛiba tamarikanit tesɛa 2 n leqrun seg wasmi ay d-tebda, ma d Ldzayer tesɛa ala 30 n yiseggasen aya seg wasmi ay terẓem anrar i teẓruggta (taɛaddud). «Iwufeq Mass Malinowski dakken tella tlelli meɣɣren n tɣemsa deg Lezzayer», ɣef wakken ay d-iwekked Mass Grine, am wakken ay d-yerna dakken deg wakud ay yekka deg Lezzayer, ifuṛes tilelli-a, maca, «iban dakken maci kullec ifaz yernu taɣemsa (tadzayrit) mazal la tetteddu ɣer sdat». «Ssarameɣ dakken seg-a ɣef kra n yiseggasen, ad nessiweḍ ɣer weswir n tezdeg n ṣṣenɛa d wetwal ay nessaram, am wakken ara d-tili tlelli tameqrant n tɣemsa», ɣef wakken ay d-yerna. Yenna-d daɣ Mass Grine i Mass Malinowski dakken tella teẓruggta deg tɣemsa yernu ur yelli akk wedras (raqaba) ama ɣef uneɣmas, ama ɣef tɣemsa.
