Ilmend n umuli wis 62 γef wasmi tenddeh tegrewla n Lezzayer, ddeqs n leqdicat i d-ittewheggan di 04 n tγemmar n tmurt. Dγa taddart n Texliǧt n Σettu di temnaḍt n Yiferḥunen, lwilaya n Tizi Uzzu, llan di ttiεad n wass n umezruy, anda ara ldin yiwen n usebdad n ugrawliw Yaḥa Ʃabd Lḥafid i yetwasnen s yisem n tegrewla Si Lḥafiḍ. D yiwen n umeγras u d agrawliw meqqren. Illul deg yirebbi n taddart n Texliğt At Ʃettu, ass, n 26 deg yennayer 1933. D azamul u d amedya n tebγset d umennuγ γef tlelli, imi yella gar yimenza i d-yerran i teγri n umenzu n unbir 1954, akken tamurt ad tt-id-kksen deg ufus n waεdaw. Si Lḥfiḍ, yewwi-d abrid zeddigen, muḥal yekna i lbaṭṭel, muḥal yexdem miḥyaf gar yimdanen. Di tallit-nni n tegrewla, yella d aγella gar temnaḍt n Σin Lḥemmam d Draε Lmizan, yella γer yidis n yigrewliwen meqqren n lwilaya tis3 tamazrayt am, Remḍan Σebban, Σmiruc, Krim Belqasem, Muḥend Welḥağ d waṭas-nniḍen. Mebεed timmunent, Si Lḥafiḍ yella d aqerru n ukabar n Tirni n Yiγallen n Yinemlayen (FFS), γer yidis n Si Lḥusin At-Ḥmed akked Muḥend Welḥağ i yettnaγen mgal adabu n Ben Bella. Syin, yunnag γer tmurt n Fransa, anda ikemmel amennuγ i lfayda n tmurt almi d asmi yewweḍ leεfu n Rebbi deg waggur n furar 2016, di leεmer-is 83 n yiseggasen.
Islam Bessaci