Ass-nni n aram, 8 deg unbir 2016, ɣef zuğ n tmeddit, yella-d leqdic adelsan i d-thegga tenmehla n usegmi n lwilaya n Tizi Uzzu deg uxxam n yidles Mouloud Mammeri. Deg leqdic-a, tella-d temsizzelt gar tesnawiyin n Tizi Uzzu akked tesnawiyin n Lezzayer -asamer. Ma ɣef yiswiyen n temlilit, nnan-d yimḍebbren, Mass Boukhalfi d Mass Ali Ahmed : ‘’nebɣa ad nessufeɣ ciṭ inelmaden deg tegnatin-nni n leqraya i wakken ad steɛfun. Ad ccnun, ad xedmen addal, am wakken, diɣ, ad uraren timsezzilt gar tisnawiyin.’’ Akka, dɣa, i d-tella temsizzelt gar tesnawiyin n Tizi Uzzu akked d tesnawiyin n Lezzayer-asamer. Aya, yella-d s ttawil n umaṭṭaf amezwaru. Ttekkan deg temsizzelt inelmaden i d-yufraren deg yal tasnawit, iwakken ad d-rren ɣef yisestanen n tangiwin yemgaraden. Tangiwin–agi, llant kraḍ, deg-sent, mebla lxetyar, ilaq fell-asen ad d-rren ɣef yisestanen, gar-asent : taɛrabt, tusnakt, tiraklt d umezruy. Ma d tangiwin-nniḍen, llant-d s lxetyar am teglizit , tafransist, tussna , tasengama. Leqdic-a, yella-d s lmendad n umaswaḍ i d-yettwaceyyɛen seg uɣlif n usegmi, Mass Staihi Said , llan, diɣ, yiselmaden i d-yefkan isestanen n yal tanga , d yineɣmasen. Bdan seg tanga taɛrabt, terra-d ɣef yisetanen tnelmedt n tesnawit Fethi Said n Draa Ben khedda, tanga tusnakt, terra-d fell-as Fakhour Celia seg tesnawit n Hamki Idir, tanga n umezruy, terra-d fell-as Ait Larbi Kenza seg tesnawit n Toumi n Tegzirt, tanga n teglizit, terra-d fell-as Bilak Liza seg tesnawit n Abane Remdane, tanga n tusnakt, terra-d fell-as Boustona Nesrine seg tesnawit n stanbouli, tanga tussna terra-d fell-as, Ait Said Taous seg tesnawit n Micli , ma d tanga n tefransist terra-d fell-as, Ait Mouloud Ouardia seg tesnawit n 20 aout 1956. Ayen yessferḥen aṭas wid i d-yerzan ɣer temlilit-a, d tezlatin-nni n Nouara d Idir i d-ccnan yinelmaden. Ha-ten-in yigemmaḍ i d-yeffɣen ɣer taggara. I usmekti, inelmaden-agi yettekkin n uswir wis kraḍ yettrağu-ten ukayad n BAC taggara (deg wayyur n yunyu). Afud igerrzen
Zakia Ben yahia